Hollandezët e Ajax kanë shprehur interesin e tyre për kartonin e Jordan Henderson. Anglezi u transferua tek arabët e Al Ettifaq gjatë merkatos së verës, por sipas raportimeve, ka vendosur të largohet pas vetëm disa muajsh në Arabinë Saudite. Megjithatë, duket se Ajax do të përballet me konkurrencën e klubeve të tjera nga Premier League dhe Bundesliga, që gjithashtu kërkojnë të firmosin me mesfushorin.
Burimet pranë lojtarit bëjnë me dije se skenari ideal për Henderson është rikthimi në Premier League, teksa 2 ekipe ende të panjohura angleze kanë shprehur interes. Ndërkohë përsa i përket interesit të Ajax, problem kryesor për realizimin e transferimit mbetet paga e Henderson. Klubi hollandez nuk mundet t’i ofrojë lojtarit të njejtën ofertë financiare si Al Ettifaq. Megjithatë, përfaqësuesit e klubit besojnë se 33 vjecari mund të bëjë kompromis në këtë pjesë.
Ajax ka nevojë për përforcime dhe eksperiencë në mesfushë, dhe anglezi duket alternativa perfekte për klubin, që është në një periudhë rinovimi. Ajax startoi sezonin në formë mjaft të dobët, por eventualisht gjigandët hollandezë iu rikthyen rezultateve pozitive. Tashmë Ajax mban vendin e pestë në renditjen e përgjithshme të Eredivisie.
Lajmet për dëshirën e Henderson për t’u larguar janë një tjetër goditje për trajnerin e Al Ettifaq, Steven Gerrard. Legjenda e futbollit anglez bëri thirrjen për përforcime në merkaton e janarit, teksa skuadra e tij ndodhet në vendin e 8 në Saudi Pro League, plot 28 pikë larg kryesuesëve të Al Hilal. Al Ettifaq nuk ka regjistruar asnjë fitore në 8 takimet e fundit. Për më shumë, asistenti i Steven Gerrard, Ian Foster, gjithashtu u largua këtë muaj. Ky i fundit do të startojë një karrierë të re si trajner i Plymouth Argyle.
Mbetet të shohim nëse Henderson do të largohet në janar nga Al Ettifaq, apo mesfushori do të duhet të presë deri në fund të sezonit.
