Kombëtarja angleze siguroi një fitore brenda parashikimeve përballë modestëve të Andorës, me rezultatin 3-0. Kjo ishte fitorja e 5-të rradhazi në grupin për kualifikueset e Botërorit 2022, dhe trajneri Gareth Southgate, rikonfirmoi dhe një herë konsistencën dhe seriozitetin e lojtarëve të tij, edhe në ndeshje që duken të fituara në letër.
Numri 1 i pankinës së “3 Luanëve” hodhi në fushë një formacion me plot 11 ndryshime nga ai i përballjes së kaluar me Hungarinë. Arsyeja besohet të jetë përballja e rradhës me Poloninë, që mund të konsiderohet si kundërshtari më i fortë i Anglisë në grupin I.
Për anglezët realizuan Lingard (18′, 78′), Kane (72′) dhe Saka (85′). Në sy ra dhe performanca mjaft e mirë e talnetit të Borussia Dortmund, Jude Bellingham. Lojtari që është produkt i Birmingham City, regjistroi një tjetër ndeshje mjaft të mirë, duke marrë në disa raste ovacione nga tifozët në Wembley.
Ndërkohë, në një përballje mjaft emocionuese, Uellsi i Gareth Bale arriti të marrë një fitore në minutat e fundit përballë Bjellorusisë. Heroi i uellsianëve ishte pikërisht kapiteni i tyre dhe lojtari i Real Madrid, Bale.
Sulmuesi i dha kombëtares së tij avantazhin, teksa shënoi nga pika e bardhë e penalltisë. Por, të zotët e shtëpisë barazuan po me penallti 24 minuta më vonë. Më pas, vetëm 1 minutë pas golit të barazimit, bjellorusët shënuan golin e avantazhit, duke shkuar në dhomat e zhveshjes me rezultatin favorizues 2-1.
Në pjesën e dytë ishte përsëri kapiteni i uellsianëve që shndërroi në gol një tjetër penallti në minutën e 69’, duke rivendosur ekuilibrin në fushë. Kur u duk se gjithçka ishte drejt fundit, Gareth Bale arriti të mposhtë për herë të tretë portierin kundërshtar Sergei Chernik, me një goditje të ulët e cila i dha fitoren Uellsit në minutën e 93’. Tripleta e Bale shërben kështu për të mbajtur gjallë endrrën e kualifikimit për përfaqësuesen e tij.
