Arrihet marrëveshja, Wembley mirëpret 65,000 fansa për finalen e Europianit

Më në fund, përpjekjet për një marrëveshje mes qeverisë angleze dhe UEFA-s kanë arritur në një konkluzion pozitiv. Stadiumi Wembley do të hapë dyert e tij për më shumë se 65,000 fansa për finalen e gjysmëfinalet e Euro 2020. Arena ka një kapacitet maksimal prej 90,000 vendesh, por gjatë fazës në grupe të Europianit, është përdorur vetëm çereku i këtij kapaciteti, pra 22,500 vende.

Në fazën me eleminim direkt që do të startojë së shpejti, arena do të akomodojë deri në 45,000 tifozë. Lajmin për ndryshimet e reja e bëri të ditur prestigjozja “The Times”. Megjithëse marrëveshja ende nuk është zyrtarizuar, portali insiston se është thjesht çështje kohe përpara se qeveria e Boris Johnson të zyrtarizojë vendimin. Ky është një zhvillim mjaft pozitiv, duke marrë parasysh se Anglia bëri një hap prapa me kufizimet anti-covid. Kryeministri Johnson shtyu lehtësimin e masave anti-covid nga 21 Qershori në 19 Korrik. Megjithatë, duket se kjo nuk vlen për Europianin e futbollit.

Pavarësisht kësaj, të gjithë personat që duan të sigurojnë një vend në Wembley gjatë finales, duhet të paraqesin prova se kanë marrë të dyja dozat e vaksinës për coronavirusin. Alternativa tjetër është një test negativ i cili është kryer së fundmi.

Megjithëse sipas të gjitha gjasave marrëveshja është arritur, ende ka përpjekje për t’i rrëmbyer Anglisë të drejtën e organizimit të finales. Kryeministri italian Mario Draghi mbështet fort idenë se finalja e Euro 2020 duhet të luhet në Romë. Draghi u shpreh:

“Do të mundohem që të ndaloj organizimin e finales, në një vend ku infeksionet po rriten shpejt. Besoj se ndeshja nuk duhet të luhet në një vend ku risku i infektimit është shumë i madh.”

Pavarësisht dëshirës së kryeministrit italian, organizatorët e UEFA ka shumë pak shance që të ndërmarrin një ndryshim drastik plani. Por, kjo varet dhe nga ecuria e luftës kundër corona virusit në Mbretërinë e Bashkuar.