Drejtuesit e Arsenal duket se do të hidhen në sulm për mesfushorin e Real Madrid, Brahim Diaz, në merkaton e verës. Londinezët po kalojnë një sezon fantastik, teksa kryesojnë renditjen e Premier League, ndërkohë që kanë mbetur vetëm 10 ndeshje nga fundi i kampionatit anglez. Megjithatë, duket se Arsenal po përgatitet që tani për sezonin e ardhshëm.
Sipas raportimeve në mediat angleze, klubi londinez ka bërë një ofertë prej 70 milionë eurosh për Brahim Diaz të Real Madrid. Marokeni po kalon një sezon fantastik në Bernabeu, teksa është aktivizuar rregullisht me ekipin, si dhe ka impresionuar me paraqitjet e tij. Brahim ia doli të shënojë dhe në fitoren e fundit të madrilenëve ndaj Osasuna, me rezultatin 4-2. Presidenti i Real Madrid, Florentino Perez, duhet të vendosë tashmë nëse do të shesë lojtarin, apo do të refuzojë ofertën e Arsenal.
Duke qënë se sipas të gjitha gjasave, Kylian Mbappe do t’i bashkohet Real Madrid sezonin e ardhshëm, hapësirat për Diaz në formacionin titullar do të jenë edhe më të limituara. Lojtari është i ndërgjegjshëm për këtë fakt dhe kjo mund ta shtyjë atë të favorizojë dhe vet një largim nga Spanja. Megjithatë, ende nuk dihen preferencat e marokenit mbi të ardhmen e tij.
Arsenal ndërkohë ka dhe objektiva të tjerë në merkaton e verës. Qëllimi kryesor i klubit londinez është një sulmues qendre. Shumë analistë sportivë dhe fansa kanë shprehur gjithmonë dyshimet e tyre mbi aftësinë e Arsenal për të fituar trofe, me Gabriel Jesus dhe Eddie Nketiah, si dy opsionet e vetme në sulm. Ndërkohë kujtojmë se klubi londinez gjithashtu duhet të paguajë 27 milionë paundë për shërbimet e portierit Raya në fund të sezonit. Raya luan për momentin si i huazuar tek Arsenal nga skuadra e Brentford, por në fund të sezonit, transferimi i tij tek “topcinjtë” do të bëhet përfundimtar.