Trajneri i Arsenal, Mikel Arteta, ka shprehur dëshirën për të rikthyer në skuadër, ish-trajnerin legjendar të klubit, Arsene Wenger. Raportime të mediave angleze bëjnë me dije se Arteta ka komunikuar me Wenger për këtë çështje. Megjithatë, ende nuk dihet qëndrimi i ish-teknikut francez. Ky i fundit ka drejtuar për plot 22 vite londinezët, duke fituar 3 tituj kampionë në Premier League.
Arteta shpenzoi 5 vite të karrierës së tij si lojtar, nën drejtimin e Wenger. Kuptohet se spanjolli ka një konsideratë të lartë për ish-teknikun 72 vjeçar. Këtë gjë trajneri i “topçinjëve” e shprehu së fundmi:
“Do të gëzoheshim shumë nëse ai (Wenger) do të rikthehej. Mendoj se prania e tij dhe mjedisi që do të krijonte rreth vetes do të ishte fantastike. Kjo jo vetëm për shkak të admirimit dhe dashurisë që secili në klub ka për të, por dhe për shkak të natyrës së tij si person.”
Arteta zëvëndësoi Unai Emery si trajner i Arsenal në dhjetor të vitit 2019. Ishte pikërisht Emery që erdhi në krye të londinezëve, pas 22 viteve të Wenger në krye të skuadrës. Ndërkohë Arteta nuk qartësoi se çfarë roli do të ketë Wenger në klub, nëse plani për rikthimin e tij konkludohet me sukses:
“Ajo çfarë dua të them është se kam dëshirë që Wenger të jetë më afër klubit, personalisht mendoj se do ishte një ndihmë e madhe. Gjërat e tjera kërkojnë kohë, dhe duhet t’i përcaktojë vet ai.”
Si trajner, Arteta ia doli të udhëhiqte Arsenal drejt triumfit në FA Cup gjatë sezonit 2019-2020. Londinezët e mbyllën kampionatin në vendin e 8, duke mos u kualifikuar në kompeticionet europiane për herë të parë pas 25 vitesh. Pritshmëritë janë të larta për Arsenal, por dhe gjatë këtij sezoni, ekipi nuk ka arritur të tregojë konsistencë në rezultate.