Ylli i West Ham, Lucas Paqueta, i është përgjigjur spekullimeve për një transferim të mundshëm tek Manchester City në merkaton e verës. Braziliani është linkuar disa herë me ekipin e Pep Guardiola, teksa disa media angleze kanë shkuar edhe më tej, duke thënë se lojtari ka pranuar termat personalë të kontratës me Manchester City. Verën e kaluar futbollisti ishte shumë afër transferimit në Etihad, por duket se tashmë Paqueta ndihet i lumtur në Londër.
Në një intervistë të fundit për ESPN, lojtari u shpreh:
“Duhet të bëj punën time këtu te West Ham. Kam respekt shumë të madh për klubin. Jam shumë i lumtur këtu, nëse do thoja që nuk jam do të gënjeja. Sigurisht, ka shumë gjëra që ndodhin jashtë fushës, por unë mbetem i fokusuar për të bërë më të mirën time, për të mbyllur sezonin mirë. Ajo që thonë në lidhje me Manchester City është e gjitha nga merkatoja e kaluar. Tani është momenti të mbyllim sezonin dhe më pas të presim për atë që do të ndodhë.”
Verën e kaluar City e plotësoi hapësirën në mesfushë duke afruar Matheus Nunes. Megjithatë, në rastin e largimit të Bernardo Silva, “qytetarët” do të jenë në kërkim të një tjetër mesfushori me tipare ofensive, dhe Paqueta do të ishte blerja perfekte për City.
Braziliani pritet të jetë i okupuar dhe me kombëtaren e tij, në Copa America këtë vit gjatë verës. Një problem potencial që mund të ndalë transferimin e Paqueta tek Manchester City është përfshirja e lojtarit në vendosjen e basteve të jashtëligjshme. Vitin që lamë pas ylli i West Ham ishte nën investigimin e autoriteteve, dhe kjo ishte një prej arsyeve se përse transferimi tek “qytetarët” dështoi. Edhe kësaj rradhe, drejtuesit e City duan të jenë të bindur përpara se të hedhin një hap për të firmosur me brazilianin.