Sulmuesi i talentuar i Real Sociedad, Alexander Isak, është nën shënjestrën e londinezëve të Arsenal. Lajmi bëhet i ditur nga prestigjozja “The Sun”, sipas së cilës, suedezi është lojtari perfekt për skemën e trajnerit Mikel Arteta.
Isak po kalon një formë mjaft të mirë në Spanjë, dhe kjo gjë nuk kishte sesi t’i shpëtonte vëmendjes, së klubeve të mëdha në Europë. Vet lojtari ka bërë të qartë simpatinë që ka për kampionatin anglez, dhe ka thënë se ambicia e tij është që një ditë të luajë në Premier League. Isak do të ishte zëvëndësuesi perfekt për Alexandre Lacazette, i cili pritet të lërë klubin në verën e ardhshme.
Lojtari mund të largohet drejt rivalëve të Manchester City. Kjo pasi Pep Guardiola ka nevojë për një sulmues tipik, pozicion ky që i mungon listës së lojtarëve që trajneri spanjoll, ka në dispozicion.
Por Arsenal ka gati dhe një plan rezervë. Londinezët raportohet se gjithashtu janë duke monitoruar yllin e Torino, Andrea Belotti. Avantazhi i italianit është fakti se kushtet financiare për afrimin e tij janë më të favorshme. Ndërkohë Marco Asensio i Real Madrid është gjithashtu një nga të preferuarit e Mikel Arteta.
Sipas raportimeve, Arsenal ka bërë një ofertë për spanjollin, por ende nuk dihet vendimi i trajnerit Zidane, dhe presidentit Perez, mbi fatin e lojtarit. Pavarësisht talentit, Marco Asensio e ka patur të vështirë të gjejë hapësira tek galaktikët, duke marrë parasysh konkurrencën e fortë brenda grupit. Por kjo nuk do të thotë që Arsenal e ka të hapur rrugën drejt afrimit të sulmuesit. Liverpool është gjithashtu shumë i interesuar në shërbimet e spanjollit, dhe Jurgen Klopp pritet të luftojë fort për të siguruar kartonin e tij.
Një tjetër opsion interesant për londinezët është dhe Luka Jovic i Real Madrid, i cili mund të zbarkojë në Emirates, në formën e një huazimi.