Pas raportimeve të mediave sportive, që lidhën Mikel Artetën me postin e trajnerit të Barcelonës, tekniku i Arsenal ka reaguar duke sqaruar situatën. Spanjolli tha se ndihet shumë i lumtur tek Arsenal, dhe duket se nuk ka ndërmend të largohet nga Emirates, të paktën në të ardhmen e afërt. Arteta komentoi shkurtimisht:
“Ata (Barcelona) kanë një trajner fenomenal i cili është një legjendë absolute e klubit…”
Në këtë mënyrë tekniku i Arsenal ka treguar respektin e tij për trajnerin Xavi, duke lënë të kuptohet se katalanasit janë për momentin në duar të sigurta. Vet Arteta ka shkëlqyer këtë sezon në drejtimin e Arsenal, teksa ekipi kryeson Premier League-ën pas 12 javësh kampionat.
Ndërkohë, londinezët kanë siguruar me sukses vendin e parë ose të dytë në grupin A të Europa League. Gjithsesi, ekipi ende nuk ka siguruar vendin e parë, teksa ka grumbulluar 12 pikë, 2 më shumë se PSV Eindhoven që renditet e dyta.
Barcelona, Ajax, Bayer Leverkusen dhe Sporting Lisbon janë disa nga ekipet “big” që do të garojnë me njëra-tjetrën në raundin e ardhshëm të Europa League. Kjo do të thotë se mund të shohim një përballje potenciale mes Arsenal dhe ekipit të Xavi Hernandez. “Topçinjtë” do të përballen me Zurich ditën e nesërme, ndërkohë që të dielën i pret një sfidë mjaft e rëndësishme përballë Chelsea në Premier League.
Pavarësisht kësaj, trajneri Arteta ka thënë se do të luajë me një skuadër mjaft kompetitive përballë Zurich, duke qënë se nuk do të rrezikojë vendin e parë në grup. Sulmuesi Bukayo Saka mund të jetë sërish pjesë e formacionit bazë, pas lajmit se dëmtimi i marrë në sfidën ndaj Nottingham Forest nuk ishte serioz. Saka gjithashtu pritet të jetë një nga figurat kryesore të kombëtares angleze, në Botërorin e Katarit.
