Trajneri i Arsenal, Mikel Arteta, ka thënë se forma e mirë e ekipit të tij përpara portës, nuk do të ndryshojë planet e klubit për merkaton e verës. Arsenal ka fituar të shtata ndeshjet e luajtura këtë vit në Premier League, me rezultatin e përgjithshëm 31-3. Megjithatë, duket se drejtuesit e klubit nuk do të heqin dorë nga afrimi i një sulmuesi të ri, për sezonin e ardhshëm.
Arsenal mposhti Sheffield United me rezultatin 6-0 në Bramall Lane, dhe do të përballet në sfidën e rradhës me Brentford. Ndërkohë, trajneri Arteta ka gjetur rastin të komentojë mbi planet për merkaton e rradhës. Tekniku spanjoll u shpreh se asgjë nuk do të ndryshojë dhe strategjia e klubit është menduar në plan afatgjatë:
“Planet që kemi për në verë janë shumë të qarta. Ato janë mbyllur që në fillim të këtij sezoni, duke marrë parasysh kontratat që kemi me lojtarët aktualë, si dhe disa aspekte ku mund të përmirësohemi. Situata e tanishme nuk e ndryshon këtë.”
Por cilët janë emrat që janë përfolur për t’u bërë pjesë e repartit ofensiv të klubit londinez? Emri më i lakuar vazhdon të mbetet ai i Ivan Toney. Brentford e vlerëson kartonin e lojtarit në shifrat e 80 milionë paundëve, një vlerë jo e vogël, por që Arsenal padyshim mund ta përballojë. Gjithsesi, drejtuesit e Arsenal sigurisht kanë gati dhe planin B, që përfshin disa opsione. Viktor Gyökeres i Sporting Lisbon dhe Evan Ferguson i Brighton janë gjithashtu nën radarin e klubit londinez. Megjithatë, Arteta u pyet nga mediat në mënyrë direkte për Ivan Toney, por spanjolli refuzoi të jape detaje:
“Nuk mund të flas për asnjë lojtar. Nëse flas për një më duhet të përjashtoj shumë të tjerë pasi ne jemi të linkuar me shumë lojtarë.”