Drejtuesit e Arsenal vazhdojnë të jenë të interesuar për talentin e Wolves, Pedro Neto. Londinezët janë prej kohësh duke monitoruar lojtarin, teksa trajneri Arteta dhe drejtori sportiv Edu, janë adhurues të 23 vjeçarit. Portugezi është një fans i vetëshpallur i Arsenal, gjë që e vendos klubin londinez në një pozitë më të avantazhuar se klubet rivale që duan të bëjnë të vetin Neto.
Lojtari përfaqësohet nga super-agjenti Jorge Mendes, dhe u përfol për një transferim drejt Arsenal, që në këtë merkato vere. Megjithatë, drejtuesit e Wolves u treguan të shpejtë për të mbyllur bisedimet, pasi nuk donin që të humbisnin superstarin e tyre. Ndërkohë, starti fantastik që Neto ka bërë këtë sezon, me shumë mundësi do të përkthehet dhe në rritjen e vlerës së kartonit të portugezit. Momentalisht lojtari vlerësohet në shifrën e 28 milionë eurove.
Neto ka një kontratë aktive me Wolves deri në vitin 2027, gjë që mund të komplikojë një lëvizje të mundshme të Arsenal në janar. Lojtari firmosi kontratën vitin e kaluar, duke shprehur besnikërinë e tij ndaj Wolves. Megjithatë kjo mund të ndryshojë. Arsenal nga ana tjetër ka nevojë për përforcime në repartin ofensiv, dhe është duke marrë parasysh dhe opsione të tjera.
Një tjetër alternativë për klubin londinez është dhe sulmuesi Ivan Toney i Brentford. Gabriel Martinelli dhe Leandro Trossard janë momentalisht të dëmtuar tek Arsenal, situatë që lë trajnerin Arteta në kërkim të alternativave në sulm. Gjithsesi duhet thënë se Neto do të mbetet fokusi kryesor i drejtuesëve të klubit.
Arsenal u përpoq të firmoste me portugezin që në vitin 2017, kur ky i fundit luante për Braga në Portugali. Asokohe trajner i Arsenal ishte Arsene Wenger. Gjithsesi sulmuesi iu bashkua italianëve të Lazio, përpara se të transferohej tek Wolves, ku karriera e tij mori dhe hovin kryesor.
