“Topçinjtë” e Arsenal startuan sezonin në Premier League, në mënyrën më të keqe të mundshme, duke humbur 3 ndeshjet hapëse. Por 3 fitoret e fundit në kampionat, jo vetëm që kanë ngjallur shpresën te tifozët e londinezëve, por në të njejtën kohë duket se kanë ndryshuar dhe fatin e trajnerit Arteta.
Ishte ish-mbrojtësi i Arsenal, Gael Clichy, i cili para fitores 3-1 të “topçinjëve” përballë Tottenham, dha një opinion mjaft kontrovers. Sipas Clichy, Arteta ka të gjitha mundësitë që të jetë Wengeri i dytë tek Arsenal. Mendimi i ish-mbrojtësit u duk disi i tepruar para ndeshjes, por performanca fantastike e Arsenal është padyshim meritë dhe e trajnerit Arteta. Gael Clichy deklaroi për BBC Radio 5:
“Arteta ka kaq shumë njohuri, ai ka pasur luksin të mësojë nga Pep Guardiola. Vërtet mendoj se në planin afatagjatë, ai mund të jetë Arsene Wengeri i ardhshëm i klubit. Ai është shumë i ri dhe mendoj se nëse i jepet kohë, do t’i mbushë mendjen të gjithë kritikëve.”
Pas ndeshjes, ishte Graeme Souness, legjenda e Liverpool, që gjithashtu komentoi mbi takimin:
“Spursat ishin shokues në pjesën e parë, ndërsa Arsenal fantastik. Por spursat? Vërtet keq. U surprizova nga mënyra se sa keq po luanin.”
Sulmuesi i Arsenal, Smith Rowe, i cili gjeti rrjetën përballë Tottenham, tha për mediat:
“Kjo është me shumë mundësi dita më e bukur e jetës time. Familja ime ishte sot këtu, është një ndjenjë speciale.”
Fitorja e fundit e ngjit Arsenal mbi Tottenham në renditje, por “topçinjë” gjithsesi gjenden në vendin e 10, shumë larg rivalëve si Liverpool, Manchester City apo Chelsea. Muaji tetor rezervon përballje interesante për të besuarit e Artetës, dhe spanjolli do të ketë shancin të vërtetojë nëse Arsenali nën drejtimin e tij, është apo jo në rrugën e duhur.