Aston Villa ka arritur në një marrëveshje me Bayer Leverkusen, për shërbimet e anësorit Leon Bailey. 23 vjeçari nga Xhamaika ka shënuar 28 gola në 119 ndeshje në Bundesliga me Bayer Leverkusen. Lojtari bëhet kështu futbollisti i tretë i afruar te klubi anglez, pas ardhjes së Emiliano Buendia nga Norwich City dhe Ashley Young nga Inter Milan.
Ndërkohë, Villa pritet të bëjë një tjetër ofertë për James Ward-Prowse, i cili aktualisht aktivizohet me Southampton. Oferta e parë prej 25 milionë paundësh u refuzua nga këta të fundit, dhe Aston Villa pritet të vijë me një ofertë më të mirë financiare. Klubi anglez, sipas raportimeve është shumë afër pranimit të ofertës astronomike të Manchester City, për kartonin e Jack Grealish.
Ndërkohë, turqit e Fenerbahce i kanë sytë tek Cedric Soares i Arsenal. Futbollisti është ndër të preferuarit e trajnerit të klubit, Vítor Pereira, i cili ka shprehur publikisht pëlqimin e tij për lojtarin. Portugezi u shpreh se patrioti i tij, është një emër që mund t’i përshtatet moduleve të ndryshme të lojës tek Fenerbahce. Soares mund të aktivizohet si një mbrojtës i djathtë, por dhe më i avancuar si një mesfushor i mirëfilltë krahu.
Nga Italia vijnë lajme interesante mbi fatin e Manuel Locatelli. Lojtari i cili aktivizohet me Sassuolon ishte ndër pikat kyç të kombëtares italiane gjatë Euro 2020, duke i ndihmuar ata të ngrenë lart trofeun. Kjo gjë ka rritur interesin e klubeve europiane që janë të interesuara për shërbimet e tij, mes tyre rivalët e Juventus në Serie A.
“Zonja e Vjetër” ka kohë që po mban në vëzhgim lojtarin, por sipas raportimeve të fundit marrëveshja ende nuk është arritur për shkak të mos rënies dakord për termat financiarë. Sassuolo kërkon 40 milionë euro për Locatelli, por Juventus nuk është gati të paguajë këtë shifër. Nëse negociatat vonojnë, ata që përfitojnë mund të jenë Arsenal apo Liverpool, të cilët mund të plotësojnë që tani kërkesat ekonomike të italianëve.