Adama Traoré ka qënë padyshim një nga lojtarët më të dalluar të Barcelonës, që prej ardhjes së tij në Camp Nou gjatë merkatos së janarit. Sulmuesi erdhi nën hijen e transferimeve më të bujshme si ai i Ferran Torres apo Pierre Emerick Aubameyang. Por Traoré ka fituar tashmë një vend si titullar në ekipin e trajnerit Xavi. Megjithatë, kjo nuk do të thotë se e ardhmja e tij në Spanjë është e sigurtë.
Adama ndodhet në Spanjë i huazuar nga anglezët e Wolverhampton deri në fund të sezonit. Barcelona ende nuk ka vendosur nëse do të blejë përfundimisht kartonin e lojtarit, por nëse do ta bëjë këtë gjë, atëherë duhet t’i paguajë Wolves 30 milionë euro. Shifra nuk është e vogël, sidomos për Barcelonën duke marrë parasysh gjendjen e vështirë ekonomike të katalanasve.
Spanjollët mund të gjejnë akordin për kartonin e Traoré duke i propozuar Wolverhampton një shkëmbim. Momentalisht, sulmuesi portugez i Barcelonës, Francisco Trincao, luan si i huazuar me Wolves. Nëse këta të fundit vendosin që të blejnë përfundimisht shërbimet e tij, Adama mund të firmosë zyrtarisht me Barcelonën për një kosto shumë më të reduktuar, ose zero.
Duke gjykuar nga rrethanat e klubit, ky duket si i vetmi opsion që sulmuesi të bëhet zyrtarisht lojtar i blaugranave. Kujtojmë se Barcelona ende nuk ka hequr dorë nga transferimi i Erling Haaland. Ka shumë media që thonë se spanjollët janë momentalisht ekipi që kryeson garën për shërbimet e asit të Dortmund. Por Barcelona duhet të mbledhë një shumë të konsiderueshme parash për t’ia arritur këtij qëllimi. Kjo është dhe arsyeja tjetër se përse klubi nuk mund të rrezikojë duke shpenzuar shumë para për Adama.
Presidenti i katalanasve, Joan Laporta, deklaroi gjatë prezantimit të Traoré se qëllimi dhe dëshira e klubit është që lojtari të luajë në Camp Nou edhe pas këtij sezoni.