Mbrojtësi legjendar i Barcelonës, Gerard Pique, ka bërë të ditur lajmin se do t’i jape fund karrierës së tij si futbollist, këtë fundjavë në Camp Nou. 35 vjeçari postoi një video në rrjetet sociale, ku iu drejtua të gjithë fansave të klubit katalanas, dhe jo vetëm. Pique u shpreh:
“E kam thënë gjithmonë se nuk do të kishte asnjë klub tjetër pas Barcelonës, dhe kështu do të jetë… Futbolli më ka dhënë mua gjithçka. Barça më ka dhënë mua gjithçka, ju (fansat) më keni dhënë gjithçka. Tani që ëndrrat e një djaloshi të vogël janë bërë realitet, më duhet t’ju them se ka ardhur koha që këtij rrugëtimi t’i vijë fundi.”
Ndërkohë Pique ka siguruar fansat se kjo nuk është një lamtumirë përgjithmonë nga Barcelona, dhe se në një moment të caktuar do të rikthehet përsëri në Camp Nou, herët apo vonë. Futbollisti u shkëput ndërkohë nga kombëtarja e Spanjës që në vitin 2018.
Spanjolli është një produkt i akademisë së Barcelonës, dhe deri në vitin 2004 ishte një lojtar me ekipet e moshave tek Blaugranat. Më pas mbrojtësi firmosi me Manchester United, ku luajti një rol kyç në sukseset e “Djajëve të Kuq”, të cilët fituan kampionatin, si dhe Champions League-ën në sezonin 2007-2008. Menjëherë pas kësaj, Pique vendosi t’i ribashkohej ekipit të tij të vjetër dhe ajo që pasoi ishte një histori e jashtëzakonshme suksesi.
Mbrojtësi ka luajtur më shumë se 600 ndeshje me Barcelonën dhe ka fituar plot 30 trofe, duke përfshirë këtu 8 tituj kampionë në La Liga, 3 Champions League dhe 7 Copa del Rey. Megjithatë, situata është mjaft ndryshe këtë sezon në kampin katalanas. Ekipi është eleminuar nga Champions League që në fazën në grupe, ndërsa në kampionat mban vendin e dytë, por diferenca nga Reali kryesues është vetëm 1 pikë.