Sipas raportimeve më të fundit në Spanjë, Barcelona është duke parë me interes të madh, mundësinë e transferimit të Bernardo Silva në Camp Nou. Mesfushori i talentuar i Manchester City është një nga lojtarët e preferuar të trajnerit Xavi, por qëndrimi i “qytetarëve” mbi këtë çështje ende duket i paqartë.
Mediat në Angli bëjnë me dije se City i ka dhënë aprovimin super-agjentit Jorge Mendes, që të ecë para me negociatat nëse Barcelona ofron çmimin e duhur për Silva. Kampionët në fuqi të Premier League kërkojnë rreth 70 milionë paundë për portugezin. Megjithatë, trajneri Pep Guardiola ende e sheh Silvan si pjesë të rëndësishme të planeve të tij për të ardhmen.
Tekniku spanjoll ishte gati të linte lojtarin të largohej verën e kaluar për arsye personale, por Barcelona nuk e shfrytëzoi dot këtë mundësi. Tashmë Manchester City po heziton të heqë dorë nga mesfushori, i cili pas 5 sezoneve në Etihad ka fituar Premier League-ën plot 4 herë. Situata gjithashtu komplikohet nga largimet e City. Pavarësisht ardhjes së Erling Haaland dhe Kalvin Phillips, “qytetarët” pranuan ofertën e Arsenal për Gabriel Jesus, si dhe atë të Chelsea për Raheem Sterling. Oleksandr Zinchenko gjithashtu pritet t’i bashkohet Arsenal, teksa 2 klubet kanë rënë dakord në parim për lëvizjen. Për këtë arsye Guardiola nuk do të rrezikojë duke dobësuar ekipin e tij në prag të sezonit të ri.
Barcelona nga ana tjetër duhet patjetër të shesë Frenkie de Jong, përpara se të mund të japë dritën jeshile për transferimin e Silva. Manchester United mbetet ekipi favorit për të siguruar firmën e mesfushorit hollandez. Kjo është e vetmja mënyrë që katalanasit të sigurojnë fondet e nevojshme për operacionin. Gjithsesi, mbetet të shohim nëse City do t’i dorëzohet presionit të Barcelonës, duke hequr kështu dorë nga Bernardo Silva.
