Presidenti i Barcelonës, Joan Laporta, ka thënë se klubi është “shtëpia” e Lionel Messi, duke lënë kështu të kuptohet se katalanasit presin rikthimin e argjentinasit në Spanjë. Kontrata e Messi me Paris St-Germain skadon në fund të këtij sezoni, dhe shumë media sportive kanë linkuar lojtarin me një lëvizje drejte Arabisë Saudite.
Megjithatë, duket se drejtuesit e Barcelonës nuk kanë hequr dorë nga ëndrra e rikthimit të superstarit në Camp Nou. Në një intervistë të fundit për TV3, presidenti Laporta u shpreh se katalanasit mund të konkurrojnë më këdo klub tjetër që kërkon shërbimet e Messi. Laporta komentoi:
“Historia na mbështet, ndjenjat janë shumë të forta, kemi 400 milionë fansa në të gjithë botën. Ai është një lojtar i Paris St-Germain dhe duhet të presim deri në fund të sezonit, më pas mund të flasim qetësisht…Me gjithë respektin për Arabinë Saudite, Barça është Barça dhe është shtëpia.”
Komentet e presidentit Laporta erdhën pas fitores së Barcelonës ndaj Espanyol me rezultatin 4-2, që zyrtarizoi dhe triumfin e katalanasve në La Liga për këtë sezon. Në një deklaratë të mëparshme, Laporta u shpreh akoma dhe më i vendosur për të sjellë dhe një herë tjetër Messin në Camp Nou. Presidenti u shpreh në një transmetim live në Twitch, se klubi do të bëjë “gjithçka është e mundur” për të firmosur me Messi.
Argjentinasi është padyshim lojtari më i rëndësishëm në historinë e Barcelonës. Messi ia doli të fitonte plot 10 herë titullin kampion me Barcelonën, mes viteve 2004 dhe 2021. Sulmuesi ka hasur vështirësi në 2 sezonet e tij në Francë, teksa ende nuk ka gjetur pozicionin dhe formën e tij më të mirë me parizienët. Së fundmi, tifozët e klubit francez janë tallur duke brohoritur kundër tij në sfidën ndaj Ajaccio, që PSG fitoi me rezultatin 5-0.
