Trajneri i ri i Barcelonës, Xavi Hernandez, do të ketë më pak se 10 milionë euro në dispozicion, për transferime gjatë merkatos së janarit. Lajmi u bë i ditur nga ESPN, dhe sipas medias prestigjoze, informacioni është bërë i ditur nga burime zyrtare brenda klubit.
CEO i Barcelonës, Ferran Reverter, deklaroi disa javë më përpara se klubi do të kishte në dispozicion 20 milionë euro për merkaton e dimrit. Por gjërat duket se kanë ndryshuar që prej atij momenti. La Liga ka një limit prej 97 milionë eurosh shpenzime për sezon. Katalanasit ndërkohë kanë formosur kontrata të reja me Ansu Fatin dhe Pedrin. Të dy futbollistët do të përfitojnë shuma të mëdha parash, gjë që ka ndikuar dhe te financat e disponueshme të klubit për merkato.
Ndërkohë, fillimisht u mendua se shkarkimi i Koeman gjithashtu do t’i kushtonte klubit, duke qënë se kontrata e trajnerit hollandez u ndërpre në mënyrë të njëanshme. Por burime pranë Barcelonës bëjnë me dije se kjo gjë nuk ka patur impakt real tek financat e blaugranave.
Spanjollët mund t’i paguajnë Koeman, deri në 12 milionë euro, por jo më shumë se kaq. Nga ana tjetër, afrimi i Xavi i kushtoi klubit të paktën 5 milionë euro, që ishte klauzola për prishjen e kontratës me Al Sadd.
Për shkak të humbjeve të mëdha gjatë sezoneve të kaluara, La Liga uli limitin e shpenzimeve të Barcelonës gjatë sezonit, nga 300 milionë euro, në vetëm 97 milionë. Katalanasit gjithashtu kanë regjistruar borxhe të mëdha, të cilat kapin shifrën e 1.4 miliardë eurove. Xavi u prezantua si trajneri i ri i klubit këtë javë. Ish-mesfushori i Barcelonës është i detyruar të kërkojë për alternativa huazimi ose lojtarë me kosto shumë të ulët në janar. Spanjollët gjithashtu nuk do të jenë në gjendje t’u ofrojnë paga të larta futbollistëve të tyre.
