Bayern Munich duket se do të luftojë me Liverpool, për të siguruar shërbimet e trajnerit të Leverkusen, Xabi Alonso. Spanjolli është momentalisht kandidati kryesor për të zëvëndësuar Jurgen Klopp në krye të Liverpool, pasi gjermani do të largohet në fund të sezonit. Megjithatë, Bayern gjithashtu kërkon me ngulm Alonso, pas lajmit për largimin e Thomas Tuchel në fund të sezonit. Duket se bavarezët kanë tashmë gati dhe një propozim financiar për Alonso.
Sipas mediave angleze, gjigandët e Bayern janë gati t’i ofrojnë teknikut të Leverkusen 20 milionë paundë në vit. Për ta vënë propozimin në prespektivë, kjo shifër është gati 4 herë më e madhe sesa ajo që Xabi përfiton momentalisht tek Bayer Leverkusen. Nëse spanjolli do të pranojë propozimin potencial të Bayern, ai do të bëhej zyrtarisht trajneri më i paguar në historinë e Bundesliga.
Pavarësisht se aspekti financiar nuk pritet të jetë faktori kryesor në marrjen e vendimit për Alonso, oferta e Bayern do të vërë padyshim në lëvizje Liverpool. “The Reds” e shohin spanjollin si zëvëndësuesin perfekt të Jurgen Klopp, duke marrë parasysh suksesin e Alonso tek Bayer. Klopp përfiton rreth 15 milionë paundë në sezon tek Liverpool, dhe sipas të gjitha gjasave, drejtuesit e klubit anglez do të jenë në gjendje të bëjnë një kundër-ofertë, cilado qoftë oferta e Bayern për Alonso.
Tekniku i Leverkusen ka refuzuar mundësinë për të qënë pjesë e stafit stërvitor të Pep Guardiola tek Manchester City në të kaluarën, dhe nga suksesi i tij me Leverkusen është kthyer në një nga trajnerët më të kërkuar nga klubet elitare në Europë.
Thomas Tuchel paguhet rreth 10 milionë paundë në sezon tek Bayern dhe ekipi bavarez nuk ka frikë të shpenzojë më shumë, për të hedhur baza të sigurta drejt një projekti afatgjatë. Megjithatë, e ardhmja e Xabi Alonso është ende e paqartë, dhe pritet të jetë e tillë të paktën deri në fund të sezonit.
