Manchester City dhe Liverpool janë të dy të interesuar për mesfushorin e talentuar të Bayern Munich, Joshua Kimmich. Gjermani duket se nuk e përjashton një transferim në Premier League, teksa po i afrohet tashmë vitit të fundit në kontratën e tij aktuale me gjigandët bavarezë. Interesimi i gjigandëve të Premier League për Kimmich është mjaft konkret dhe kjo ka shqetësuar drejtuesit e Bayern që janë duke shqyrtuar tashmë opsionet që kanë në tavolinë.
Sipas burimeve në mediat angleze, Manchester City është në një fazë më të avancuar të bisedimeve sesa Liverpool. Drejtuesit e City janë të besimit se mesfushori gjerman mund të përshtatet mjaft mirë me Rodri në Etihad. Një tjetër faktor që avantazhon më shumë “qytetarët” në garën për kartonin e Kimmich është Pep Guardiola. Tekniku spanjoll ka punuar më përpara me Kimmich tek Bayern dhe i vlerëson mjaft lart aftësitë e tij si lojtar.
Ndërkohë Barcelona është gjithashtu një tjetër klub i linkuar prej kohësh me lojtarin gjerman. Megjithatë, situata e vështirë financiare e spanjollëve është një disavantazh i madh në garën për shërbimet e Kimmich. Bayern Munich nga ana tjetër nuk dëshiron të lejojë mesfushorin të largohet, por bavarezët janë në një pozitë të vështirë. 2025 është viti i fundit në kontratën e lojtarit dhe nëse nuk arrihet një marrëveshje për rinovim, gjermani do të largohet me kosto zero nga Allianz Arena.
Liverpool ndërkohë nuk është në faza të avancuar në interesimin e vet për Kimmich. Kjo dhe për shkak të paqartësisë mbi postin e trajnerit për sezonin e ardhshëm. “The Reds” ende nuk kanë përcaktuar zëvëndësuesin e Jurgen Klopp, dhe ky vendim do të ndikojë ndjeshëm në planet e merkatos për ekipin.
Mbetet të shohim nëse Kimmich do të largohet nga Bayern Munich, apo do të bindet për të rinovuar përsëri me gjigandët gjermanë.