Bayer Leverkusen duket se do të përfitojë një shumë të madhe financiare, nëse vendos të shesë shërbimet e talentit Florian Wirtz. Kjo pasi që tani duket se ka një garë të ashpër mes disa klubeve europiane për kartonin e gjermanit. Liverpool dhe Manchester City në Angli duan të sjellin në Premier League lojtarin, ndërkohë që Bayern Munich gjithashtu ka shprehur prej kohësh interesin për talentin e Leverkusen. Por cili do të jetë destinacioni i ardhshëm i Wirtz dhe kur mund të ndodhë transferimi?
Gjermani pritet të jetë pjesë e Bayer Leverkusen edhe në sezonin e ardhshëm. Lajmi është bërë i ditur nga babai dhe njëkohësisht agjenti i tij, Hans-Joachim, për Sky Sport. Hans u shpreh për median sportive:
“Momentalisht, të gjitha gjërat po ecin në drejtimin ku Florian do të vazhdojë të luajë për Leverkusen dhe sezonin e ardhshëm.”
Kjo do të thotë se një transfertë me shumë mundësi do të vonojë deri në vitin 2025, dhe nga ajo që bëjnë të ditur burimet pranë lojtarit, Bayern Munich mbetet destinacioni më i preferuar. Kjo pasi Wirtz i pëlqen të luajë në Bundesliga, të paktën dhe për disa sezone. Megjithatë, Liverpool dhe Manchetser City nuk kanë ndërmend të dorëzohen, teksa të dyja ekipet angleze mbeten admiruese të mëdha të lojtarit.
Agjentët e Manchester City ishin të pranishëm në fitoren e Leverkusen ndaj Hoffenheim para disa javësh, për të ndjekur nga afër Florian Wirtz, ndërkohë që është bërë tashmë e ditur se “qytetarët” kanë qënë duke monitoruar lojtarin që vitin e kaluar.
Arsenal, Newcastle dhe Barcelona gjithashtu kanë qënë të linkuara me talentin e Bayer Leverkusen. Megjithatë, duket se City, Liverpool dhe Bayern Munich janë ekipet që kryesojnë garën momentalisht. Sulmuesi ka shansin të fitojë titullin kampion në Bundesliga këtë sezon, teksa Leverkusen vazhdon të kryesojë renditjen e përgjithshme në Gjermani.
