Bayern Munich ka shkarkuar në mënyrë surprizë trajnerin Julian Nagelsmann dhe ka emëruar gjermanin Thomas Tuchel si zëvëndësuesin e tij. Ky i fundit do të firmosë një kontratë deri në vitin 2025 me bavarezët. Vendimi është pritur me mjaft habi nga opinioni sportiv, duke marrë parasysh dhe momentin e pazakontë për të hedhur një hap të tillë.
Megjithatë, drejtori ekzekutiv i Bayern Munich, Oliver Kahn, ka komentuar mbi arsyet që sollën shkarkimin e Julian Nagelsmann. Kahn u shpreh:
“Kur firmosëm me Julian Nagelsmann në verën e vitit 2021 ishim të bindur se do të punonim me të në një plan afatgjatë, dhe ky ishte qëllimi i të gjithëve deri në fund. Por tani kemi arritur në konkluzionin se kualiteti i ekipit tonë, pavarësisht titullit të Bundesliga sezonin e kaluar, ka pësuar rënie. Pas botërorit kemi luajtur më me pak sukses dhe në mënyrë më pak tërheqëse. Ndryshimet e mëdha në performancë kanë hedhur dyshime mbi qëllimet tona për këtë sezon por dhe për të ardhmen. Kjo është arsyeja se përse vendosëm të veprojmë tani…”
Kahn gjithashtu shtoi:
“Personalisht dhe në emër të Bayern dua të falenderoj Julian dhe ekipin e tij, dhe t’u uroj të gjithëve fat në të ardhmen.”
Të dielën e kaluar Bayern u mposht në kampionat nga Bayer Leverkusen. Ky rezultat do të thotë se bavarezët kanë fituar vetëm 5 nga 10 përballjet e fundit në Bundesliga. Ndeshja e rradhës për ekipin do të jetë përballë Dortmund, ish-ekipit të Thomas Tuchel. Ky i fundit fitoi Champions League me Chelsea në vitin 2021, por pavarësisht kësaj, u shkarkua nga klubi londinez në startin e këtij sezoni.
Tuchel e njeh mjaft mirë kampionatin gjerman, por gjithashtu ka mjaftueshëm eksperiencë europiane për të udhëhequr Bayern përsëri drejt triumfit në Champions League.