Thomas Tuchel do të largohet në fund të sezonit nga drejtimi i Bayern Munich. Lajmi është bërë i ditur nga vet klubi, që ka bërë me dije se vendimi është marrë në marrëveshje me të dyja palët. Tuchel zëvëndësoi Julian Nagelsmann në marsin e vitit të kaluar, ndërkohë që marrëveshja e tij aktuale me Bayern ishte e vlefshme deri në vitin 2025. Megjithatë, rezultatet e dobëta në javët e fundit kanë bërë që drejtuesit e klubit të ndërpresin bashkëpunimin me trajnerin gjerman.
Bayern Munich gjendet tashmë plot 8 pikë larg Bayer Leverkusen në renditjen e Bundesliga. Bavarezët u mposhtën me rezultatin 3-0 nga Leverkusen, në një sfidë direkte mjaft të rëndësishme për fatin e titullit kampion. Për më shumë, ekipi i Tuchel u mposht dhe nga Lazio në Champions League, me rezultatin minimal 1-0.
Pas lajmit për largimin e Tuchel në fund të sezonit, CEO i Bayern Munich, Jan-Christian Dreesen u shpreh:
“Qëllimi ynë është të krijojmë një aleancë sportive me një trajner të ri për sezonin 2024-2025. Deri në atë moment, të gjithë individët në klub do të kenë sfidë për të punuar dhe arritur maksimumin e mundshëm në Champions League dhe Bundesliga.”
Dreesen gjithashtu deklaroi se është i bindur që pavarësisht humbjes në sfidën e parë ndaj Lazio në Champions League, Bayern do të avancojë në fazën e ardhshme me ndihmën e tifozerisë vendase në Allianz Arena.
Ndërkohë, Thomas Tuchel gjithashtu reagoi pas lajmit për largimin e tij. Tekniku gjerman u shpreh:
“Ne do të largohemi në fund të sezonit. Deri në atë moment, ekipi im stërvitor dhe unë do të vazhdojmë të bëjmë gjithcka për të garantuar sukses maksimal.”
Për momentin, ende nuk është e qartë se cili do të jetë zëvëndësuesi i Thomas Tuchel në krye të pankinës së Bayern Munich, sezonin e ardhshëm.