Kapiteni i Real Madrid, Karim Benzema ka rinovuar kontratën e tij me “Los Blancos” dhe për 1 vit tjetër. Për francezin, marrëveshja nënkupton se ai do të luajë sezonin e tij të 14-ë për spanjollët, një arritje historike. 33 vjeçari mbërriti në Bernabeu në vitn 2009, dhe ka shënuar plot 281 gola për madrilenët.
Sulmuesi francez është golashënuesi i 5-të më i mirë në historinë e Real Madrid. Edhe këtë sezon, duket se Benzema e ka nisur me “kembën e mbarë” kampionatin. Karim shënoi 2 gola në sfidën hapëse të La Liga përballë Alaves, që Real Madrid e fitoi me rezultatin 4-1. Rinovimi i kontratës së futbollistit erdhi pas një tjetër nënshkrimi shumë të rëndësishëm të Real Madrid.
Portieri belg Thibaut Courtois rinovoi dhe për 5 vite të tjera me spanjollët. Kontrata e re do të thotë se Courtois do të mbajë veshur fanellën e “galaktikëve” deri në vitin 2026.
Ndërkohë nga Anglia, lajme interesante vijnë nga Manchester City i Pep Guardiolës. Ky i fundit i ka dhënë një mesazh të rëndësishëm lojtarëve të tij, duke i nxitur të marrin vaksinën anti-covid. Numri i lojtarëve të diagnostifikuar pozitiv me covid në Premier League, arriti në 11 ditën e hënë. Kjo gjë duket se ka vënë në alarm numrin 1 të pankinës së City, por dhe trajnerë të tjerë si Mikel Arteta, Nuno Espirito Santo, Steve Bruce dhe Graham Potter, të cilët gjithashtu kanë bërë thirrjet e tyre.
Guardiola, i cili humbi dhe mamanë e tij nga virusi, u shpreh publikisht:
“Mendoj se doktorët dhe stafi mjekësor duhet të bindin lojtarët se kjo gjë bëhet për të mbrojtur veten e tyre, familjen dhe pjesën tjetër të shoqërisë. Por, askush nuk mund t’i detyrojë ata ta bëjnë vaksinën.”
Spanjolli gjithashtu shtoi:
“Kur të gjithë shkencëtarët, doktorët dhe specialistët e mëdhenj thonë se vaksina është mënyra e vetme për të ecur përpara në mposhtjen e pandemisë, lojtarët duhet ta konsiderojnë.”