Gjermanët e Borussia Dortmund, kanë përjashtuar në mënyrë kategorike emrin e Erling Braut Haaland, nga lista e lojtarëve të disponueshëm për merkaton verore. 20 gola në 16 ndeshje në Champions League e kanë kthyer lojtarin në një nga më të kërkuarit në arenën europiane. Rrjedhimisht, lajmi ka qenë një zhgënjim për shumë klube të njohura europiane, të cilat kërkonin shërbimet e sulmuesit të talentuar.
Blutë e Chelsea kanë shprehur më fort interesin e tyre, por tani, duket se trajneri Thomas Tuchel do të duhet të vihet në kërkim për një alternativë tjetër. Sipas BBC Sport, Chelsea nuk ka marrë mundimin për t’i paraqitur Dortmund një ofertë financiare, pasi duket se dyert janë tashmë të mbyllura.
Situata ka qenë gjithashtu nën vëzhgimin e Pep Guardiolës. Numri 1 i pankinës së Manchester City është shumë i interesuar për të lidhur kontratë me një sulmues të kalibrit të lartë këtë verë. Arsyeja kryesore është largimi i Sergio Aguero drejt Barcelonës. Ky i fundit u largua me kosto zero nga “qytetarët”.
City gjithashtu është përfolur për transferimin e mundshëm të superstarit anglez Harry Kane. E ardhmja e këtij të fundit te Tottenham ka qenë vazhdimisht në dyshim, duke qenë se klubi nuk ndodhet në nivelin e duhur për të fituar trofe madhorë, gjë që është dëshira kryesore e Kane.
Pavarësisht se me Haaland u treguan kokëfortë, Borussia Dortmund u detyrua të shesë shërbimet e Jadon Sancho tek Manchester United. 21 vjeçari është një nga talentet më premtuese të kësaj decade, dhe këtë e vërteton dhe shuma që “Djajtë e Kuq” paguan për shërbimet e tij. Plot 73 milionë paund! Haaland ndërkohë pritet të ketë një tjetër sezon mjaft të suksesshëm me gjermanët në Bundesliga. Karriera e futbollistit norvegjez po menaxhohet me sukses nga super agjenti Mino Raiola.
