Anglia e Gareth Southgate startoi në mënyrë mjaft bindëse botërorin e Katarit, duke mposhtur me rezultatin e thellë 6-2 modestët e Iranit. Diferenca në kualitet ishte mëse e dukshme mes ekipeve, dhe “3 Luanët” dominuan nga fillimi në fund takimin, duke mos e vënë asnjëherë në dyshim fitoren.
Ishte Jude Bellingham ai që hapi serinë e golave për Anglinë në minutën e 35’ të takimit, pas krosimit perfekt të Luke Shaw. Përpara mbylljes së pjesës së parë, “3 Luanët” gjetën dhe 2 herë të tjera rrjetën, me Bukayo Saka dhe Raheem Sterling, duke siguruar kështu fitoren që në 45 minutat e para.
Në pjesën e dytë tabloja ishte e njejtë teksa Saka shënoi golin e dytë, përpara se Irani të shënonte një gol mjaft të bukur me anë të Taremi në minutën e 65’. Jack Grealish shënoi golin e fundit për Anglinë, ndërkohë që Irani shënoi golin e fundit të takimit në minutat shtesë nga pika e bardhë e penalltisë. Rezultati përfundimtar 6-2, dhe asnjë surprizë për të besuarit e Southgate në këtë ndeshje hapëse.
Ndërkohë nga ana tjetër, Hollanda ia ka dale të fitojë me rezultatin e pastër 2-0 përballë Senegalit në grupin A. Sfida ishte mjaft e balancuar, teksa të dyja ekipet patën rastet e tyre për shënim, por skuadrave u mungoi aftësia për të përmbyllur aksionet. Goli i parë i sfidës do të vinte vetëm në minutën e 84’ të takimit, kur Cody Gakpo arriti të mposhtë portierin e Chelsea, Edouard Mendy, duke kaluar në avantazh “tulipanët”. Davy Klaassen, i cili u fut në fushë si zëvëndësues, shënoi golin e dytë për hollandezët, në limitet e shtesës, duke vulosur kështu rezultatin përfundimtar 2-0. Të besuarit e Louis van Gaal kryesojnë tashmë grupin A së bashku me Ekuadorin, me pikë të barabarta.