Kombëtarja angleze ka mbërritur në Katar, në prag të botërorit 2022 që starton ditën e diel. Të besuarit e trajnerit Southgate do të stërviten në një kompleks stërvitor në Doha përpara ndeshjes së tyre të parë në kompeticionin prestigjoz. Anglia do të luajë takimin e parë përballë Iranit në 21 nëntor, përpara përballjeve USA dhe Uellsin.
Kapiteni Harry Kane komentoi për mediat:
“Ekzaltimi është prezent tek të gjithë ne. Jemi të lumtur që jemi këtu dhe mezi presim të fillojmë stërvitjen… Po mundohemi të mos mendojmë më shumë sesa duhet, por kuptohet se ajo (fitorja e Botërorit) është ëndrra dhe qëllimi jonë. Do të jetë një kompeticion i vështirë dhe i fortë, duhet të përgatitemi për këtë.”
Përfaqësueset kanë patur shumë pak kohë për t’u përgatitur për Kupën e Botës, duke qënë se kësaj rradhe kompeticioni prestigjoz do të zhvillohet për herë të parë në mes të sezonit futbollistik. Kane u shfaq i ndërgjegjshëm për këtë fakt, teksa pranoi vështirësitë, por tha se ekipi ndihet i motivuar. Kapiteni i “3 Luanëve” shtoi:
“Jemi mësuar t’i përgatisim ndeshjet me Anglinë në një periudhë të shkurtër, por me kompeticionet madhore është situatë pak ndryshe. Mentaliteti i ekipit do të përshtatet mirë dhe do të bëjmë të njejtën gjë.”
Trajneri Gareth Southgate gjithashtu dha komentin e tij për mediat në prag të botërorit:
“Për çdo lojtar dhe trajner është maja e futbollit botëror, prandaj kërkojmë të testojmë veten tonë në këtë skenë.”
Përpara mbërritjes në Katar, princi William përgëzoi lojtarët e kombëtares, duke u uruar atyre fat, si dhe duke i prezantuar në mënyrë simbolike me numrat e fanellave që lojtarët do të mbajnë veshur gjatë botërorit. Në një mesazh në emër të familjes mbretërore, princi u shpreh:
“Jam këtu për të thënë se pjesa tjetër e vendit është me ju. Të gjithë po bëjmë tifo për ju, shijojeni!”