Pas negociatave të fundit me drejtuesit e klubit, mediat angleze kanë bërë me dije se Kaoru Mitoma ka pranuar të firmosë një kontratë të re me Brighton. Bëhet fjalë për një kontratë afatgjatë për 5 vitet e ardhshme, një lajm ky mjaft pozitiv për Brighton, që duket se do të ruajë një nga lojtarët më të mirë në arsenalin e vet, edhe për disa sezone të tjera.
Japonezi u bë pjesë e klubit në verën e vitit 2021, kur u transferua nga Kawasaki Frontale, ekip japonez që luan në J-league. Mitoma kaloi një periudhë të shkurtër huazimi tek Union SG në Belgjikë, përpara se të rikthehej tek Brighton. Në sezonin e tij të parë në Premier League, lojtari shënoi 10 gola në 41 paraqitje, si dhe 5 asiste.
Sipas informacioneve të derimëtanishme, Mitoma pritet të sigurojë një pagë prej 80 mijë paundësh në javë në bazë të kontratës së re. Të gjitha detajet janë duke u finalizuar dhe marrëveshja pritet të mbyllet brenda kësaj jave. Procesi po ndiqet nga agjenti i lojtarit, Keisuke Sekine. Sipas zërave afër tij, agjenti ka konfirmuar se Mitoma është totalisht i përkushtuar në projektin e trajnerit De Zerbi për klubin.
Vet lojtari sezonin e kaluar u shpreh i lumtur jo vetëm për klubin ku luan, po dhe për qytetin:
“Qyteti ka një klimë të mirë, deti është afër, prandaj është një vend mjaft i mirë për të jetuar. Fansat tanë na mbështesin me zë të lartë si në shtëpi, ashtu dhe jashtë. Ndiej një ngrohtësi të vërtetë, ata janë vërtetë fansa të jashtëzakonshëm. Stafi prapa skenës janë gjithashtu njerëz mjaft të mirë, ndihem shumë i lumtur këtu.”
Mitoma ka refuzuar kështu interesimin e klubeve legjendare angleze si Liveprool, United, apo Manchester City, për të qëndruar tek Brighton.
