Sipas raportimeve të portalit të njohur portugez, SPORT TV, Bruno Fernandes është nën shënjestrën e Barcelonës. Media portugeze ka hedhur idenë se mes klubit spanjoll dhe mesfushorit, mund të zhvillohen bisedime gjatë kësaj merkatoje janari. Por Fernandes ka hedhur poshtë aludimet, duke “sulmuar” madje në mënyrë ironike shtypin portugez.
Futbollisti i ka krahasuar thashethemet me shakatë e 1 Prillit, duke komentuar në një postim në Instagram, që e linkonte atë me klubin spanjoll. Bruno ka deklaruar:
“Dhe mendova se viti i ri erdhi para pak ditëve, por paska ardhur 1 Prilli! Apo është thjesht gazetari e dobët?”
Por SPORT TV nuk është i vetmi outlet që ka sugjeruar një lëvizje të Fernandes në Spanjë. Sipas El Nacional, nëse Barcelona dështon të sjellë Erling Haaland në Camp Nou verën e ardhshme, atëherë Bruno do të kthehet automatikisht në objektivin numër 1 të katalanasve. Pra pavarësisht mohimit të akuzave nga mesfushori i United, duket se interesi i presidentit Laporta është real.
Por si është gjendja momentale e Fernandes tek “Djajtë e Kuq”? Që prej tripletës që shënoi në javën hapëse të Premier League, Bruno ka shënuar vetëm 2 gola në 16 ndeshje. Megjithëse roli i tij nuk është ai i golashënuesit, në 8 paraqitjet e fundit në kampionat, lojtari është përfshirë në vetëm 1 gol.
Portugezi iu bashkua United në merkaton e janarit, përpara 2 vitesh, dhe konsolidoi menjëherë vendin e tij si titullar në skuadër. Ai ia ka dalë të shënojë 45 gola dhe 34 asiste që prej transferimit në Angli, por së fundmi gjërat janë bërë më të vështira për Bruno. Kjo lidhet dhe me formën e përgjithshme të skuadrës, e cila pavarësisht ardhjes së trajnerit Rangnick, duket se vuan të njejtat probleme.
United ndodhet momentalisht në vendin e 7 në renditjen e Premier League, 4 pikë poshtë një vendi që i siguron kualifikimin në Champions League.
