Performanca mjaft e mirë e Bukayo Saka dhe Jack Grealish përballë Republikës Çeke ka qenë një surprizë mjaft pozitive për trajnerin e Anglisë, Gareth Southgate. Megjithatë, roli i lojtarëve asnjëherë nuk ishte parashikuar të ishte ai i titullarëve, dhe kjo e ka vënë tashmë në dilemë numrin 1 të pankinës së “3 Luanëve”.
Dyshja Saka dhe Grealish mori vlerësime mjaft pozitive, jo vetëm nga analistët sportivë, por dhe nga tifozët anglezë. Kjo vjen në një kohë ku sipas raportimeve, dëshira e Southgate që prej fillimit të Europianit ka qenë që Phil Foden dhe Mason Mount të luajnë si titullarë.
Sipas Buj dhe Dot, hostët e podcast-it të njohur “Eurosport x The Beautiful Game”, Phil Foden nuk ka shfrytëzuar në mënyrën më të mirë hapësirat, dhe besimin që i është ofruar nga Gareth Southgate. Ndërkohë Mount, megjithëse ofron shumë cilësi dhe energji, nuk përshtatet me shpejtësinë dhe tempin në të cilin luan Anglia. Ndërkohë, diferenca në lojën e “3 Luanëve” dallohej qartë kur në fushë ishte Jack Grealish. Dot u shpreh:
“Mund të shihje qartë se sa herë që Jack Grealish ishte në kontroll të topit, dhe lojtarët e tjerë ishin mjaft konfidentë.
Ata e dinin se Grealish nuk do të humbiste kontrollin, dhe do të lunate qartë dhe në tempin e tij. Në nivele të tilla ndërkombëtare të duhet një lojtar i tillë.”
Dy komentuesit gjithashtu ndajnë të njetin mendim kur bie fjala tek aktivizimi i Bukayo Saka. Sipas tyre, ishte një surprizë, por një vendim mjaft i mirë nga ana e Southgate. Saka solli në fushë të gjithë kreativitetin dhe energjinë që ka shfaqur dhe me klubin e tij Arsenal. Çelësi i performancës fantastike individuale ishte hapësira që trajneri i la djaloshit për të bërë lojën e tij. Ndërkohë duket se parashikimi i 11-shes që Southgate do të nxjerrë në fushë, në ndeshjet e ardhshme është mjaft i vështirë.