Sulmuesi i Arsenal, Bukayo Saka, nuk do të jetë pjesë e kombëtares angeze për ndeshjet ndaj Italisë dhe Australisë. Arsyeja është një dëmtim i marrë gjatë javëve të fundit, që ishte dhe arsyeja e mungesës së lojtarit në fitoren e Arsenal ndaj Manchester City. Kujtojmë se kombëtarja e “3 Luanëve” do të përballet me Australinë në një ndeshje miqësore në datë 13 Tetor. Më pas anglezët do të përballen me Italinë, në një super sfidë të vlefshme për kualifikueset e Euro 2024.
Ndërkohë në lidhje me dëmtimin e Saka, mediat angleze bëjnë me dije se nuk bëhet fjalë për dicka serioze. Megjithatë, trajneri i Arsenal, Mikel Arteta, ka refuzuar të japë më shumë detaje. Tekniku spanjoll është shprehur:
“Jo, ai (Saka) nuk do t’ia dalë. Nuk është stërvitur ende për një seancë të plotë. Për momentin ai nuk është i disponueshëm për të luajtur.”
Mungesa e Saka për Arsenal, ditën e diel ndaj City ishte e dukshme, pavarësisht fitores 1-0 të londinezëve. Përpara se të dëmtohej, Saka ishte aktivizuar në plot 87 ndeshje rresht në Premier League. Shenjat e para të dëmtimit të sulmuesit u panë që në sfidën ndaj Lens në Champions League, ku Saka dukej i shqetësuar në fushë.
Ndërkohë trajneri i kombëtares angleze, Gareth Southgate, është shprehur se nuk do të rrezikonte duke hedhur Saka në fushë, edhe nëse ai do të ishte i disponueshëm:
“Ne kemi përgjegjësinë për t’u kualifikuar për vendin tonë, por unë kam qënë gjithashtu një lojtar. Nuk kam rrezikuar dhe nuk do të rrezikoja asnjëherë mirëqënien fizike të lojtarëve të mi. Ata (klubet e Premier League) kanë besim tek ne, se marrim vendime që janë të mira për planin afatgjatë.”
Sipas të gjitha gjasave, Saka do të jetë përsëri i disponueshëm për Arsenal, në përfundim të ndeshjeve ndërkombëtare.
