Golat e Mateo Kovacic dhe Kai Havertz kanë mjaftuar që Chelsea të sigurojë një fitore të rëndësishme përballë Red Bull Salzburg, duke prerë kështu biletën për në fazën e ardhshme të Champions League. Londinezët dominuan takimin, pavarësisht se luajtën në transfertë, dhe mund të kishin shënuar më shumë gola, po të mos kishte qënë për pritjet fantastike të portierit të Salzburg, Philipp Kohn.
Ishte mesfushori kroat Kovacic ai që zhbllokoi rezultatin në minutën e 23’ të takimit, duke kaluar në avantazh miqtë me një goditje fantastike nga distanca. Megjithatë, Salzburg ia doli të gjente golin e barazimit në minutën e 48’ me anë të Junior Adamu. Ky i fundit shfrytëzoi më së miri një pasim brilant të Maximilian Wober.
Por pavarësisht golit, të zotët e shtëpisë nuk kishin asnjëherë një shans për të kthyer lojën në anën e tyre, teksa ishte Chelsea që vuri vazhdimisht në vështirësi portierin Kohn. Gardiani i portës ndali plot 4 herë Pierre-Emerick Aubameyang përpara kuadratit. Ndërkohë Jorginho goditi mjaft mirë me kokë një top, por goditja e tij u largua në vijën fatale nga Adamu. Megjithatë, përpjekjet e londinezëve u shpërblyen në minutën e 64’ të sfidës. Ishte Havertz që me një goditje mjaft të bukur i dha avantazhin Chelsea dhe siguroi dhe biletën e kualifikimit për fazën me eleminim direkt.
Anglezët e nisën rrugëtimin e tyre në Champions League këtë sezon me një humbje 1-0 ndaj Dinamo Zagreb, e cila u komentua gjatë nga opinioni sportiv. Disfata ishte një nga ndeshjet kyç që u bënë shkak për shkarkimin e trajnerit Tuchel.
Duke qënë se objektivi i kualifikimit u arrit, Graham Potter pritet të lërë pushim titullarët e tij në sfidën e ardhshme përballë Dinamo Zagreb. Në këtë mënyrë lojtarët do të kenë më shumë kohë për t’u rikuperuar dhe për të qënë në 100% e tyre, për derbin e rëndësishëm ndaj Arsenal në 6 nëntor.