Italianët e Inter siguruan kualifikimin në fazën me eleminim direkt të Champions League, pas një fitoreje bindëse ndaj Viktoria Plzen. Të besuarit e trajnerit Inzaghi bënë detyrën në shtëpi, duke shënuar plot 4 gola, dhe nuk e vunë asnjëherë në diskutim dominancën e tyre.
Ishte Henrikh Mkhitaryan ai që hapi serinë e golave në minutën e 35’ të takimit, duke dërguar topin në rrjetë me kokë, pas krosimit të Bastoni. Më pas ishte Edin Dzeko që shfrytëzoi mjaft mirë pasimin e Dimarco, duke tundur përsëri rrjetën në minutën e 42’. Pjesa e parë e takimit u mbyll me avantazhin e dyfishtë të italianëve.
Në të dytën, ishte përsëri Mkhitaryan që iu afrua shumë golit duke goditur shtyllën. Por golin e tretë të italianëve e shënoi Dzeko, i cili shfrytëzoi një asist perfekt të Lautaro Martinez. Mjaft pozitiv për zikaltërit ishte dhe rikthimi me gol i Romelu Lukaku pas dëmtimit. Sulmuesi shënoi golin e katërt për Inter në minutën e 87’. Kjo ishte paraqitja e parë për belgun që nga muaj gusht.
Rezultati do të thotë se Inter siguroi vendin e dytë në grupin C, ndërkohë që Bayern Munich mbylli grupin në vendin e parë, pas fitores së pastër 3-0 ndaj Barcelonës. Katalanasit do të luajnë tashmë në Europa League, një “shuplakë” tjetër për trajnerin Xavi. Mane hapi serinë e golave për gjermanët që në minutën e 10 të takimit, duke dërguar në rrjetë pasimin e Serge Gnabry. Ky i fundit shërbeu përsëri në minutën e 31’, kësaj rradhe për Choup-Moting, i cili dyfishoi avantazhin për bavarezët.
Golin e tretë për miqtë e shënoi Benjamin Pavard, me një tjetër asist të Gnabry. Gjermanët siguruan kështu një tjetër fitore ndaj rivalëve spanjollë, që tashmë duhet të përgatiten për ndeshjet e Europa League, pas Kupës së Botës.
