Manchester City është ndalur në një barazim 0-0 nga Copenhagen, në ndeshjen e vlefshme për grupin G të UEFA Champions League. Të besuarit e Pep Guardiolës ishin të pafat, teksa u ndëshkuan me një karton të kuq që në minutën e 30’. Ishte Gomez i cili ndërhyri në mënyrë të gabuar ndaj Haraldsson, duke i hequr Copenhagen një mundësi shumë të mirë për të shënuar. Arbitri nuk hezitoi dhe ndëshkoi me karton të kuq lojtarin e City, i cili u largua nga fusha pa protestuar.
Përpara se të ndëshkoheshin, anglezëve iu anullua dhe një gol i Rodri, për shkak të prekjes së topit me dorë nga Mahrez gjatë ndërtimit të aksionit. Ky i fundit do të humbiste dhe një penallti të akorduar në favor të City në minutën e 25’ të takimit. Në këtë moment u duk se kjo nuk ishte mbrëmja me fat e “qytetarëve”.
Por pavarësisht kësaj, të besuarit e Pep Guardiolës nuk e humbën motivimin dhe ishin ata që dominuan lojën deri në fund, duke realizuar 4 goditje në portë dhe 8 goditje nga këndi. Në përfundim të sfidës Rodri shprehu zhgënjimin e tij me rezultatin. Mesfushori spanjoll komentoi:
“Ndonjëherë është kështu, duhet t’i kalosh dhe këto ndeshje. Kartoni i kuq që erdhi herët e bëri të vështirë për ekipin, por ne luftuam deri në fund. Patëm shanset tona: shënuam një gol i cili u anullua. Humbëm një penallti por si e thashë, është e vështirë kur je 10 ndaj 11.”
Trajneri Guardiola gjithashtu bëri komentet e tij pas ndeshjes. Tekniku spanjoll u shpreh për BT Sport:
“E startuam mjaft mirë takimin kur kishim 11 lojtarë në fushë dhe më pas rezistuam për 1 orë kur ishim me 10. Kur patëm topin u treguam të zgjuar dhe nuk ushtruam shumë presion… Mbase jo matematikisht, por jemi gati të kualifikuar për raundin tjetër dhe kjo ka rëndësi.”