Manchester City dhe Real Madrid kanë siguruar fitoren, në takimet e para të fazës me eleminim direkt në Champions League. “Qytetarët” e trajnerit Pep Guardiola fituan me rezultatin bindës 3-1 ndaj FC Copenhagen në transfertë, ndërkohë që Real Madrid fitoi po në transfertë ndaj Leipzig, me rezultatin minimal 1-0.
Ishte Kevin de Bruyne ai që kaloi Manchester City në avantazh, që në minutën e 10’ të sfidës. Megjithatë, një gabim i portierit Ederson u shfrytëzua mjaft mirë nga kundërshtarët, teksa Mattsson dërgoi topin në rrjetë për të vendosur baraspeshën në fushë. Gjithsesi, anglezët nuk u demotivuan, dhe gjetën përsëri golin e avantazhit, kësaj rradhe me Bernardo Silva, pak para mbylljes së pjesës së parë.
De Bruyne dhe Erling Haaland patën raste të tjera për shënim gjatë pjesës së dytë, por goli i tretë për City erdhi vetëm në fund të sfidës, gjatë minutave shtesë, me autor Phil Foden. Anglezët kanë tashmë një avantazh mjaft komod, për ndeshjen e kthimit në Etihad, që do të luhet në date 6 mars.
Ndërkohë në Gjermani, Real Madrid mposhti Leipzig me rezultatin minimal 1-0. Të zotët e shtëpisë patën disa raste të mira për shënim, duke vënë në vështirësi spanjollët. Megjithatë, ishin të besuarit e Ancelotti ata që kaluan në avantazh në minutën e 48’ të takimit me anë të Brahim Diaz. Spanjolli mposhti dy mbrojtës dhe dërgoi topin në rrjetë me një goditje spektakolare me hark. Madrilenët patën më pas dhe raste të tjera për shënim, ku më i pastri ishte ai i Vinicus Jr, i cili goditi shtyllën. Portieri Andriy Lunin gjithashtu zhvilloi një paraqitje fantastike, teksa arriti të ndalë disa herë goditjet në portë, duke ruajtur avantazhin për ekipin e tij. Real do të presë Leipzig në Bernabeu për ndeshjen e kthimit në date 6 mars.
