Talenti i Chelsea, Levi Colwill, i cili aktivizohet si i huazuar tek Brighton, ende nuk dihet nëse do të rikthehet në Stamford Bridge sezonin e ri. Mbrojtësi kaloi një vit fantastik tek Brighton, dhe mediat angleze shpesh herë kanë linkuar emrin e tij me një largim nga Chelsea. Megjithatë, duket se trajneri i ri i bluve, Mauricio Pochettino, e sheh lojtarin në planet e tij.
Por, situata mbetet e komplikuar teksa trajneri i Brighton, Roberto De Zerbi, dëshiron që Colwill të luajë përsëri me Brighton sezonin e ardhshëm. Drejtuesit e Chelsea nga ana tjetër i kanë propozuar lojtarit një rinovim kontrate, por ky i fundit kërkon garanci për minuta në fushë nga Pochettino, përpara se të firmosë, gjë që ka komplikuar situatën.
Tekniku argjentinas do të ketë shumë opsione në prapavijë sezonin e ardhshëm, dhe Colwill nuk dëshiron të jetë opsion i dytë për Pochettino. Brighton ndërkohë raportohet se ka bërë një ofertë prej 40 milionë paundësh, për të blerë përfundimisht kartonin e lojarit, por Chelsea e ka refuzuar këtë propozim. Drejtuesit e Brighton gjithashtu po eksplorojnë mundësinë e një shkëmbimi lojtarësh, duke futur në lojë dhe Moises Caicedo, por Chelsea përsëri mbetet skeptik dhe nuk dëshiron të humbasë Colwill. Kjo, pavarësisht faktit se Caicedo është një nga lojtarët më premtues në Premier League.
Nga ana tjetër, Liverpool dhe Manchester City gjithashtu janë interesuar për mbrojtësin, por Chelsea e ka bërë të qartë se lojtari nuk është në shitje, duke i prerë rrugën bisedimeve. Në një intervistë për BBC, mbrojtësi u shpreh i lumtur për sezonin e mirë tek Brighton, por theksoi se ka ende shumë rrugë përpara:
“Po marr shumë merita, por bëj ende gabime që njerëzit nuk i vënë re… E di se mund të luaj shumë më mirë dhe kam ende shumë gjëra përpara.”
