Sipas mediave angleze, Enzo Fernandez po mendon largimin nga Chelsea, pas vetëm 1 viti në Stamford Bridge. Agjentët e lojtarit, përfshirë këtu përfaqësuesin e tij prej një kohe të gjatë, Uriel Perez, janë duke eksploruar mundësitë e ndryshme që mesfushori argjentinas ka për momentin.
Fernandez iu bashkuar Chelsea për shifrën stratosferike prej 121 milionë eurosh, por argjentinasi nuk ka arritur të ketë impaktin e pritur prej tij në Stamford Bridge. Për momentin nuk është ende e qartë nëse është vet Fernandez apo agjentët e tij ata që po mundohen të largojnë lojtarin nga Chelsea, por lëvizja nuk do të jetë aspak e lehtë. Sidomos duke marrë parasysh kontratën aktuale të mesfushorit që është e vlefshme deri në vitin 2032.
Fernandez u cilësua si një mesfushor i kompletuar përpara transferimit tek Chelsea, por argjentinasi ka dështuar të kontribuojë për të ndihmuar blutë e Londrës të arrijnë objektivat e tyre. Që prej afrimit në Stamford Bridge, Fernandez ka shënuar vetëm 5 gola si dhe ka dhënë vetëm 3 asiste në plot 49 takime. Fituesi i kupës së botës me Argjentinën erdhi tek Chelsea nga portugezët e Benfica, dhe situate e vështirë që po kalojnë blutë e Londrës e ka bërë akoma më të vështirë përshtatjen e tij me futbollin dhe nivelin e lartë të Premier League.
Trajneri i Chelsea, Mauricio Pochettino, komentoi para pak kohësh vështirësitë që Enzo Fernandez dhe Moises Caicedo kanë hasur në mesfushë këtë sezon, teksa dyshja ka dështuar të jetë efektive në krijimin e shanceve për shënim. Tekniku argjentinas u shpreh:
“Caicedo luajti një sezon tek Brighton, ndërkohë Enzo ishte tek Benfica përpara se të mbërrinte në Premier League. Marrëdhënia e tyre sigurisht duhet të përmirësohet, mes tyre por dhe individualisht. Ata janë të rinj dhe pritshmëritë janë mjaft të mëdha kur vjen këtu. Por, ata nuk janë qershia mbi tortë… Kur arrin në një ekip që është në një proces ndërtimi dhe je i ri me jo shumë përvojë, edhe nëse ke cilësi të mira, dhe njerëzit mund shohin se klubi ka paguar shumë para për ty, ata presin të performosh, por nuk është kështu në futboll. Disa njerëz mendojnë në këtë mënyrë sepse nuk dinë asgjë për futbollin.”
