Sulmuesi i Chelsea, Christopher Nkunku, do të jetë jashtë fushës së blertë për shkak dëmtimi, për një periudhë të pacaktuar kohore. Lajmi është konfirmuar nga vet klubi. Francezi mori një dëmtim në gjur, në pjesën e parë të miqësores ndaj Borussia Dortmund, javën e kaluar. Pas takimit, trajneri Mauricio Pochettino u shpreh se shpresonte që dëmtimi të mos ishte serioz, por tashmë duket se Nkunku do të humbasë fillimin e sezonit tek Chelsea.
Kujtojmë se Premier League starton ditën e diel, me super-përballjen Liverpool – Chelsea. Blutë e Londrës i pret një transfertë mjaft e vështirë në Anfield. Ndërkohë, disa raportime nga Anglia bëjnë me dije se Nkunku mund të mos jetë i disponueshëm për Chelsea deri në muajin dhjetor. Megjithatë, kjo nuk është konfirmuar ende.
Nkunku ka shënuar plot 58 gola në 2 sezonet e fundit me Leipzig. Megjithatë duket se lojtari do ta ketë të vështirë startin e aventurës në Premier League. Dëmtimi i francezit është një problem mjaft i madh për trajnerin Pochettino, duke ditur se një nga pikat më të dobëta të Chelsea sezonin e kaluar ishte pamundësia për të gjetur golin. Blutë shënuan vetëm 34 gola në Premier League sezonin që lamë pas, statistikë kjo që padyshim pati rolin e vet në renditjen në vendin e 12 të londinezëve.
Deri në momentin e dëmtimit Nkunku zhvilloi paraqitje mjaft premtuese në turin para-sezonal të Chelsea në Amerikë. Sulmuesi shënoi 3 gola në 5 ndeshje dhe në fushën e blertë u vu re një kimi mjaft premtuese mes tij dhe Nicolas Jackson. Ky i fundit është gjithashtu një nga blerjet e reja të Chelsea në merkaton e verës. Duke parë ndryshimet e shumta në organikën e Chelsea, mbetet të shohim se cili do të jetë formacioni titullar i trajnerit Pochettino këtë sezon të ri.
