Pas shkarkimit disi surprizë të Graham Potter ditën e diel, Chelsea është tashmë në kërkim të një trajneri të ri. Teksa sezoni është në pikën më kulminante, blutë e Londrës duhet të kërkojnë për një zëvëndësues të denjë në krye të pankinës, dhe alternativat duket se nuk mungojnë.
Sipas gazetarit sportiv Guillem Balague, ish-trajneri i Bayern Munich, Julian Nagelsmann, është ndër favoritët kryesorë për të marrë drejtimin e klubit londinez. Gjithsesi, tekniku gjerman është linkuar dhe me Tottenham, teksa spursat gjithashtu janë në kërkim të një trajneri elitar.
Nagelsmann u shkarkua në mënyrë krejt të papritur nga Bayern Munich, por mediat gjermane patën aluduar gjithmonë për probleme mes tij dhe disa prej veteranëve të Bayern në dhomat e zhveshjes. Gjithsesi, kjo nuk ia ul aspak vlerat teknikut gjerman, i cili në vitin 2018 refuzoi një ofertë nga Real Madrid.
Ndërkohë një tjetër emër potencial për pankinën e Chelsea është ai i Mauricio Pochettino. Trajneri argjentinas ka regjistruar aventura të suksesshme me Espanyol, Southampton dhe Tottenham, si dhe e njeh mjaft mirë kampionatin anglez. Pochettino momentalisht nuk është në drejtimin e asnjë klubi, pas largimit nga PSG në verë.
Luis Enrique është një emër mbase i pazakontë por trajneri spanjoll është i interesuar seriozisht për një aventurë në Premier League. Kjo është konfirmuar dhe nga Guillem Balagu. Gazetari u shpreh:
“Ai (Enrique) lexon vetëm mediat angleze. Ai do të punojë në Premier League, por ka një problem. Nuk ka shumë punë që Enrique do të merrte përsipër pasi ai kërkon një ekip që mund të fitojë trofe ose të bëjë gjëra interesante, dhe kjo e kufizon listën e mundësive.”
Ndërkohë mes emrave të tjerë potencialë për rolin e trajnerit të Chelsea janë dhe Zinedine Zidane dhe Antonio Conte, por këta të fundit nuk janë në nxitim për një aventurë të re.
