Superstari portugez i Juventus, Cristiano Ronaldo, ka kritikuar mediat për lajmet e ndryshme që qarkullojnë, në lidhje me një largim të tij nga Juventus. Në një postim të gjatë në Instagram, sulmuesi nuk e hodhi poshtë mundësinë e largimit, por as nuk i shprehu besnikërinë e tij klubit italian. Ronaldo tha se është i fokusuar te puna e tij, pavarësisht raportimeve që e lidhin me një rikthim të mundshëm në Madrid, ose një transferim drejt Paris Saint-Germain apo Manchester City.
Lojtari i konsideroi thashethemet për të ardhmen e tij, si mungesë respekti për atë si futbollist, dhe shtoi:
“Më pak fjalë dhe më shumë punë, kjo ka qenë motoja që më ka udhëhequr që prej startit të karrierës sime. Gjithsesi, duke marrë shkas nga të gjitha ato që janë thënë dhe janë shkruajtur kohët e fundit, më duhet të qartësoj pozicionin tim. Mënyra se si mediat po pasqyrojnë të ardhmen time tregon mungesë respekti ndaj të gjitha klubeve të përfshira në këto thashetheme, si dhe ndaj stafit dhe lojtarëve.”
36 vjeçari tha se theu heshtjen për të mos lënë asnjë person që të luajë me emrin e tij. Ronaldo u shpreh se është i fokusuar tek sfidat e së ardhmes dhe tek karriera e tij, gjithçka tjetër janë thjesht fjalë.
Më herët, trajneri i Real Madrid, Carlo Ancelotti, mohoi aludimet se klubi i tij është i interesuar në rikthimin e Ronaldos në Madrid. Italiani deklaroi:
“Cristiano është një legjendë e Real Madrid dhe ai ka të gjithë dashurinë dhe respektin tim. Nuk e kam konsideruar ndonjëherë transferimin e tij. Tani po shikojmë përpara. #HalaMadrid”
Ronaldo ndërkohë u rikujtoi dhe një herë të gjithëve, sukseset e tij gjatë qëndrimit në Spanjë. Futbollisti tha se fansat e vërtetë të Real Madrid do të vazhdojnë ta kenë atë në zemrat e tyre, ashtu si dhe Ronaldo i ka ata.
