Kombëtarja daneze u kualifikua zyrtarisht në finalet e Botërorit të Katarit 2022, pas fitores 1-0 ndaj Austrisë. Danezët ia kanë dalë të triumfojnë në të gjitha takimet kualifikuese të zhvilluara deri më tani në grupin F, duke vendosur një rekord mjaft impresiv. Këtë gjë e ka konfirmuar dhe kapiteni i ekipit, Simon Kjaer, i cili beson fort tek shancet e Danimarkës në botëror.
Kjaer deklaroi pas fitores për Kanal 5:
“Kemi arritur shumë, por thjesht sa na ka bërë më të uritur. Kemi ndërtuar një ekip me një mentalitet shumë të fortë, që vazhdimisht ka dëshirë të përmirësohet. Ndajmë aspektet më të mira të lojës me njëri-tjetrin, dhe duke përmirësuar cilësitë që kemi, mund të shkojmë shumë larg.”
Statistikat e danezëve janë vërtet të frikshme, teksa jo vetëm kanë fituar të gjitha ndeshjet kualifikuese, por nuk kanë pësuar asnjë gol. Për më shumë, përfaqësuesja ka shënuar mesatarisht mbi 3 gola për takim, dhe 27 gola gjithsej përgjatë 8 përballjeve të zhvilluara deri në këto momente.
Ishte goli i Joakim Maehle në minutën e 53’ të takimit që i dhuroi fitoren Danimarkës, pas vrapimit dhe asistit të shkëlqyer të Thomas Delaney. Kjo ishte fitorja e 8 rresht për danezët të cilët kanë dhe 2 ndeshje të mbetura në këto kualifikuese. Gjithsesi, ata janë 7 pikë para vendit të dytë, Skocisë, gjë që i bën automatikisht të kualifikuar.
Këta të fundit fituan përballë Ishujve Faroe me rezultatin 1-0, një rezultat ky i pritshëm. Rezultati do të thotë se shpresat e Austrisë, për të arritur në finalet e Botërorit, mbështeten në performancën e Ligës së Kombeve vitin e kaluar.
Gjermania ishte skuadra e parë që zyrtarizoi kualifikimin në turneun e vitit 2022 në Katar, duke vulosur vendin e parë në grupin e saj.