Sulmuesi i Real Madrid, Gareth Bale është lënë jashtë listës që kombëtarja e Uellsit ka zyrtarizuar për kualifikueset e tetorit, të vlefshme për Botërorin e Katarit. Uellsiani ka humbur 5 ndeshje me Real Madrid për shkak të një dëmtimi, që trajneri Robert Page e ka përshkruar si një “tërheqje serioze”.
Në përballjen me Republikën Çeke, 32 vjeçari do të luante ndeshjen e tij të 100 me përfaqësuesen e Uellsit, në qoftë se nuk do të kishte rënë pre e dëmtimit. Ndërkohë, lajm i mirë për trajneri Page është rikthimi i Aaron Ramsey në ekip, pas mungesës për të njejtën arsye si Bale, gjatë kualifikueseve të shtatorit.
Ndërkohë Robert Page fillimisht i frikësohej një dëmtimi më të rëndë për Bale. Ai tha se kishte frikë nëse Bale do të mund të rikuperohej në kohë për ndeshjet e nëntorit, por tani, situata duket shumë më pozitive. Tekniku u shpreh:
“Dëmtimet si ai i Bale vlerësohen nga 1 deri te 4 për shkallën e seriozitetit, dhe Bale ishte afër 4. Kjo do të thotë se është një dëmtim mjaft serioz. Jemi vazhdimisht në kontakt të afërt me të për të parë se si po ecën procesi i rikuperimit. Fillimisht mendoja se rikuperimi mund të zgjaste deri në muajin nëntor, por fatmirësisht gjërat po ecin më mirë nga çe prisnim. Por gjithsesi, si me çdo dëmtim tjetër, mund të bësh plane, por asnjëherë nuk mund të jesh 100% i sigurtë.”
Ndërkohë Page e ka pranuar faktin se mungesa e Bale është një goditje e madhe për skuadrën, e cila nuk ka një alternativë reale për mungesën e yllit të Real Madrid:
“Gareth është një lojtar special dhe do ta ndjejmë mungesën e tij. Por nuk mund të “qahemi” për këtë gjë. Duhet të përgatitemi dhe të fokusohemi në maksimum tek 2 ndeshjet e rradhës.”
