Duket se dëmtimi i marrë në ndeshjen përballë Hungarisë i ka kushtuar mjaft shtrenjtë Ousmane Dembeles. Sipas raportimeve të fundit, sulmuesi i Barcelonës do të jetë i detyruar të mbyllë Europianin në stol, pasi shkalla e dëmtimit ka qenë më e rëndë nga ajo që u mendua në fillim. Lojtari gjithashtu rrezikon startin e La Ligas me Barcelonën, dhe gjendja e tij po ndiqet me kujdes nga ekipi mjekësor i përfaqësueses së “gjelave”.
Dembele është ndjekur nga dëmtime të njëpasnjëshme, që prej transferimit të tij tek klubi spanjoll. 24 vjeçari i cili ka luajtur gjithsej 27 takime me kombëtaren franceze, iu nënshtrua skanerave në një spital në Budapest për të parë shkallën e dëmtimit. Pas diskutimeve mes stafit mjekësor të Francës dhe atij të Barcelonës u ra dakord që lojtari të lërë kampin francez për t’iu drejtuar përsëri Spanjës.
Spanjollja Cadena SER raportoi se sulmuesi mund të jetë jashtë fushës së blertë për më shumë se 2 muaj. Gjithsesi ky lajm ende nuk është konfirmuar zyrtarisht. Problemet e përsëritura me dëmtimet e kanë penguar talentin francez të tregojë potencialin e tij të vërtetë me katalanasit dhe kombëtaren.
Gjatë sezonit 2019-2020 Dembele luajti vetëm 5 ndeshje në La Liga. Megjithatë, gjatë sezonit 2020-2021 që sapo lamë pas, sulmuesi arriti të aktivizohej në 44 takime në të gjitha kompeticionet. Dëmtimi rikthen kështu kujtime të padëshiruara për Dembele, i cili vazhdimisht është vënë në qendër të kritikave, nga analistë dhe fansa të cilët e akuzojnë se nuk punon sa duhet për të qenë në formë.
Francezi u fut në lojë si zëvëndësues në të dyja ndeshjet e para të Francës në grupin F. Mungesa e tij me shumë mundësi nuk do të ketë impakt të madh në ekipin e Deschamps, i cili është i plotësuar me yje të kalibrit të lartë edhe në stol.