Sulmuesi brazilian i Paris St-Germain, Neymar, do të jetë jashtë fushave të blerta, për të paktën 8 javë. Lajmi është konfirmuar zyrtarisht nga klubi francez, pas dëmtimit që lojtari mori të dielën, në fitoren 3-1 në transfertë përballë Saint-Etienne.
29 vjeçari do të humbasë 7 ndeshje në Ligue 1, si dhe një përballje në Champions League. Ekzaminimet mjekësore konfirmuan se dëmtimi i brazilianit është i një shkalle të rëndë, gjë që u pa që në momentin e parë, kur ylli i PSG u shoqërua me barrelë jashtë fushe. Neymar ka pësuar një traumë në ligamantin e kyçit të majtë, një dëmtim ky mjaft i njohur mes futbollistëve. PSG bëri të ditur se një update i dytë do të bëhet i ditur pas 2 ditësh.
Në kampionat, parizienët janë 12 pikë para vendit të dytë në renditje, që mbahet nga Rennes. Nga ana tjetër, në Champions League, PSG e ka siguruar vendin e dytë në grup, duke prenotuar biletën për fazën me eleminim direkt. Francezët do të përballen me Club Bruges në shtëpi, në datë 7 dhjetor. Më pas Champions League do të përmbyllë fazën në grupe, për t’u rikthyer në muajin shkurt. Lajm pozitiv është fakti që Neymar sipas të gjitha gjasave, do të jetë i disponueshëm për trajnerin Mauricio Pochettino në këtë fazë.
Një tjetër lajm i mirë për teknikun argjentinas është rikthimi i Georginio Wijnaldum në stërvitje. Ish-mesfushori i Liverpool humbi ndeshjen ndaj Saint-Etienne për shkak të një dëmtimi të lehtë. Gjithsesi, ai pritet të jetë i gatshëm për sfidën përballë Nice, ditën e mërkurë. Dëmtimi i Neymar mund të ndryshojë dhe objektivat e merkatos së parizienëve. Kjo nuk është hera e parë që braziliani bie pre e dëmtimeve, dhe trajneri Pochettino mund të vihet në kërkim të një alternative të re në sulm.