Tek Borussia Dortmund janë të bindur: Haaland e ka zgjedhur tashmë destinacionin e tij të rradhës. Sulmuesi norvegjez që pritet të largohet nga Gjermania në verë, i ka bërë të ditur përfaqësuesëve të klubit dëshirat e tij mbi të ardhmen. Burimet pranë lojtarit kanë mësuar se Barcelona është zgjedhja e tij e parë për një transferim potencial në verë.
Pavarësisht interesimit të 3 klubeve angleze dhe gjithashtu Real Madrid, duket se projekti i katalanasve ka intriguar më shumë bomberin e Dortmund. Ky i fundit ka shënuar 80 gola në 79 paraqitje me gjermanët, që prej mbërritjes së tij në ekip në janar të vitit 2020. Futbollisti është vetëm 21 vjeç dhe mund të zhvillohet akoma më shumë tek Dortmund, por ai është i mendimit se karriera e tij do të marrë një kthesë më pozitive nëse i bashkohet një ekipi tjetër.
Sipas Daily Star, dëshira e Haaland për t’iu bashkuar Barcelonës ishte dhe arsyeja e shtyrjes së bisedimeve mes lojtarit dhe klubit. Sulmuesi është munduar të fitojë kohë, në mënyrë që Barcelona të ngrejë strategjinë për të siguruar financat e nevojshme, për transferimin e tij në Camp Nou. Shuma që Barcelona do të paguajë mendohet të jetë në shifrën e 300 milionë paundëve, dhe këtu përfshihen kostoja e kartonit të tij, rrogat përgjatë kontratës së re me klubin, dhe komisionet e agjentëve.
Manchester United, Manchester City, Chelsea, Real Madrid dhe Paris Saint-Germain janë gjithashtu të interesuar për shërbimet e Haaland. Pavarësisht lajmeve se sulmuesi preferon Barcelonën, ekipet rivale nuk kanë ndërmend të dorëzohen, sidomos duke marrë parasysh situatën e vështirë financiare të katalanasve.
Blaugranat kanë një borxh që përllogaritet të jetë rreth 670 milionë paundë. Kjo do të thotë se ekziston mundësia që klubi të dështojë në gjetjen e fondeve për transferimin e Haaland. Në këtë rast, Real Madrid por dhe klubet angleze, janë gati të përfitojnë.