Me shumë mundësi, Dublini do të hiqet nga lista e vendeve organizatore, që UEFA ka përcaktuar për Euro 2020. Kjo pas deklaratës së fundit të ministrit Leo Varadkar, i cili bëri të ditur për mediat se është ende shumë shpejt për të konsideruar praninë e fansave në stadiumet e kryeqytetit irlandez. Ndërkohë UEFA ka shtyrë marrjen e vendimit për vendet organizatore, që nuk garantojnë praninë e fansave në stadiume. Organi më i lartë i futbollit në Europë është shprehur se vendimi final do të merret në date 23 Prill.
Minstri Varadkar u shpreh për mediat vendase:
“Lajmi i fundit që dëgjova është se organizatorët (UEFA), kërkojnë garancinë tonë për një pjesëmarrje minimale prej 25% në stadiume.
Minstri Varadkar
Jemi plotësisht të ndërgjegjshëm mbi këtë kusht. Por, mendojmë se muaji qershor është shumë herët për ta realizuar një gjë të tillë. Nëse ata (UEFA) vazhdojnë të insistojnë mbi këtë gjë, fatkeqësisht do të jetë e vështirë për t’u realizuar.”
9 nga qytetet organizatore të eventit prestigjoz kanë konfirmuar se kanë kapacitetet e duhura për të zbatuar kushtin e UEFA-s. Por Dublini, Bilbao dhe Munich ende nuk kanë dalë garant përballë organit. Bëhet e ditur se komiteti ekzekutiv i UEFA-s po shqyrton alternativa konkrete mbi organizimin e ndeshjeve. Sipas një skenari të mundshëm, Anglia mund të organizojë ndeshje shtesë nëse 3 qytetet e sipër-përmendura përjashtohen nga organizimi i Europianit. Zëra të tjerë thonë se Rusia është gjithashtu e gatshme të ndërmarrë organizimin e sfidave shtesë.
Shtyrja e vendimit nga ana e UEFA erdhi pas lajmit të bujshëm për krijimin e një kompeticioni të ri të quajtur “Super Liga”. Ky plan duket se është shumë pranë dështimit, pasi të gjashta klubet angleze kanë hequr dorë zyrtarisht nga ideja. Kjo erdhi pas reagimit të ashpër nga ana e fansave dhe opinionit publik. Klubet e tjera të përfshira pritet që shumë shpejt të dalin me të njejtin reagim.
