Drejtuesit e rinj të Chelsea kanë shkarkuar trajnerin Thomas Tuchel, 100 ditë pas marrjes në pronësi të klubit. Ish-tekniku i Borussia Dortmund dhe Paris St-Germain largohet kështu nga Stamford Bridge pas 3 trofeve të fituar në 20 muaj. Presidenti i bluve, Todd Boehly, ka vendosur përkohësisht në krye të skuadrës, stafin ndihmës të Tuchel, derisa klubi të përcaktojë pasardhësin e Tuchel.
Sipas burimeve të BBC Sport, vendimi për shkarkimin e Tuchel ishte marrë përpara humbjes surprizë ndaj Dinamo Zagreb. Mediat angleze besojnë se klubi do të vendosë në krye të skuadrës një trajner së shpejti dhe favoritët kryesorë janë Graham Potter i Brighton, Mauricio Pochettino, ish-trajneri i Real Madrid, Zinedine Zidane, si dhe Brendan Rodgers i Leicester City. Qëllimi i drejtuesëve është të vendosin në krye të skuadrës një trajner afatgjatë, që ndaj të njejtin vizion dhe ide me pronarët e rinj të klubit.
Për momentin Chelsea ndodhet në vendin e gjashtë në renditjen e Premier League, pas 3 fitoreve, 1 barazimi dhe 2 humbjeve. Blutë shpenzuan plot 255 milionë paundë në merkaton e verës, duke afruar 8 lojtarë të rinj. Burime pranë ekipit bënë me dije se Tuchel kishte humbur besimin e disa prej lojtarëve të Chelsea, si dhe anëtarëve të bordit drejtues. Gjermani gjithashtu u gjobit 2 herë gjatë këtij sezoni për sjelljen e tij në fushën e blertë.
Në një deklaratë zyrtare për mediat, drejtuesit e klubit londinez u shprehën:
“…Pronarët e rinj mendojnë se është koha e duhur për të bërë këtë tranzicion. Në emër të të gjithëve tek Chelsea, klubi dëshiron t’i urojë mirënjohjen Thomas dhe stafit të tij, për të gjitha përpjekjet dhe kohën e tyre në klub. Thomas do të ketë me të drejtë një vend në historinë e Chelsea pasi fitoi Champions League-ën, Super Kupën dhe Botërorin e Klubeve.”
