Sipas mediave sportive ndërkombëtare, Manchester City ka arritur akordin me Borussia Dortmund për transferimin e bomberit Erling Haaland në Etihad sezonin e ardhshëm. Klubi anglez ka refuzuar të komentojë lajmet e fundit, por burime afër “qytetarëve” bëjnë me dije se gjithçka është gati dhe Haaland mund të prezantohet si lojtar i City, që javën e ardhshme.
Vet drejtori sportiv i Dortmund, Sebastian Kehl, la të kuptohet se largimi i Haaland mund të zyrtarizohet shumë shpejt, teksa lojtari ia ka komunikuar këtë fakt dhe shokëve të tij tek skuadra gjermane. Gazetari i famshëm Fabrizio Romano gjithashtu konfirmoi lajmin, duke shtuar se bisedimet intensive mes City dhe Dortmund po zhvillohen tashmë prej javësh. Në këtë pikë, klubi anglez mjafton të aktivizojë klauzolën për prishjen e kontratës aktuale të Haaland me Dortmund.
“Qytetarët” do t’i paguajnë klubit gjerman 63 milionë paundë për shërbimet e sulmuesit. Kjo është një shifër mëse e përballueshme për City, por shpenzimet e vërteta të Haaland do të lidhen me pagën e norvegjezit. 21 vjeçari pritet të përfitojë rreth 500,000 paundë në javë, në një kontratë 5 vjeçare me klubin. Por këto janë detaje ende të pakonfirmuara, të cilat mund të ndryshojnë.
Haaland ka shënuar gjithsej 92 gola në 121 paraqitje me Molde, Red Bull Salzburg dhe Borussia Dortmund, në kampionatet respektive. Vitin e kaluar ai u bë lojtari më i ri që ka shënuar 20 gola në një sezon të vetëm të Champions League.
Bomberi norvegjez do të jetë pikërisht ajo çka i ka munguar Manchester City, që vuan prej kohësh për një sulmues të mirëfilltë pas largimit të Sergio Aguero drejt Barcelonës. Pep Guardiola ndërkohë do të mbështetet sezonin e ardhshëm tek aftësitë e jashtëzakonshme të Haaland, për të provuar dhe një herë tjetër fatin në Champions League, objektivin madhor të “qytetarëve”.