Cristiano Ronaldo do të jetë përsëri lojtar i Manchester United. Lajmi i bujshëm u bë i ditur vetëm para pak orësh nga klubi i “Djajëve të Kuq”, në atë që duket se është lëvizja më spektakolare e kësaj merkatoje vere, së bashku me transferimin e Leo Messit te PSG.
Në një deklaratë zyrtare, Manchester United u shpreh se të gjithë anëtarët e klubit dhe tifozët, janë të ekzaltuar për të mirëpritur dhe një herë në “shtëpi” portugezin. 36 vjeçari kishte ende rreth 1 vit të mbetur në kontratë me “Zonjën e Vjetër”, por mesa duket marrëveshja është prishur më herët.
Agjenti i futbollistit, Jorge Mendes ka qenë në Torino gjatë kësaj jave, për të diskutuar të ardhmen e ish-sulmuesit të Real Madrid. Mësohet se portugezi ka shprehur dëshirën për t’u larguar nga klubi, megjithëse ende nuk raportohet se cili ka qenë shkaku që futbollisti ka ndryshuar qëndrimin e tij, dhe ka pranuar ofertën e United.
Marrëveshja erdhi pas 24 orëve dramatike, ku rivalët e Manchester City ishin gjithashtu në garë për shërbimet e CR7. Sipas trajnerit Solskjaer, ishte shoku i Ronaldos te kombëtarja portugeze, Bruno Fernandes, i cili ka komunikuar me ish-lojtarin e Juventus, duke i mbushur mendjen për të pranuar transferimin.
Burime të tjera jo zyrtare thonë se Sir Alex Ferguson gjithashtu ka patur ndikimin e tij që Cristiano të rikthehet dhe një herë në Angli. Pas postimit të United, ishte vet futbollisti i cili në Instagram, falenderoi Juventus dhe fansat, duke bërë zyrtar largimin:
“Sonte largohem nga një klub fantastik, më i madhi në Itali dhe padyshim një nga më të mëdhenjtë në Europë. Gjithmonë do ta dua qytetin e Torinos, deri në ditët e mia të fundit. Tifozat bardhezinjë gjithmonë më kanë respektuar, dhe unë jam munduar të luftoj për ta në çdo ndeshje, çdo sezon dhe çdo kompeticion.”
Ronaldo e mbylli postin me fjalë emocionuse:
“Itali, Juve, Torino, tifoza bianconeri, do të jeni gjithmonë në zemrën time.”
