Chelsea, Leicester City dhe Crystal Palace janë vetëm 3 nga klubet e Premier League, të interesuara në shërbimet e yllit të Ajax, Edson Alvarez. Mesfushori me tipare mbrojtëse është kthyer në një nga lojtarët më të rëndësishëm të hollandezëve, që prej transferimit të tij nga CF America në vitin 2019.
Një burim pranë agjentëve sportivë i ka bërë me dije Football Insider, se klube të ndryshme në Premier League janë duke monitoruar në mënyrë konstante performancat e Alvarez këtë sezon. Ajax kuptohet se dëshiron që mos ta humbasë mesfushorin, i cili gjithashtu aktivizohet dhe në pozicionin e qendër-mbrojtësit. Por presioni mbi Ajax është në rritje, dhe shumë shpejt pritet të vijnë oferta zyrtare për shërbimet e futbollistit.
Alvarez ka një kontratë të vlefshme me Ajax deri në vitin 2025. Pavarësisht rolit të tij difensiv, lojtari ia ka dalë të shënojë 2 gola dhe 1 asist këtë sezon. Por cili klub është më afërt tij, në rastin e një largimi potencial?
Chelsea ka nevojën më të madhe për të bërë përforcime në mbrojtje. Andreas Christiansen, Antonio Rudiger dhe Cesar Azpilicueta do të jenë të gjithë lojtarë të lirë në verë, pasi kontrata e tyre skadon në fund të sezonit. Por lajmi më “i keq” për Chelsea, është fakti se të gjithë mbrojtësit e përmendur, po përfliten për një largim të mundshëm, dhe sipas mediave lokale nuk kanë dëshirë të rinovojnë. Vetëm Thiago Silva ka pranuar një rinovim kontrate, deri në fund të sezonit të ardhshëm, por londinezët kanë nevojë për figura të reja në repartin e mbrojtjes.
Palace ndërkohë gjithashtu ka nevojë për mbrojtës, pasi Conor Gallagher luan si i huazuar nga Chelsea. Kjo do të thotë se blutë mund ta thërrasin lojtarin përsëri në ekipin e tyre, në fund të sezonit.
