La Liga momentalisht ka një kryesues surprizë. Pikërisht Real Sociedad. Ekipi i Imanol Alguacil u mund nga Barcelona javën e parë të La Liga, por që prej atij momenti janë të pamposhtur në Spanjë. Kjo do të thotë se në mënyrë disi të pazakontë, El Clasico-ja mes Real Madrid dhe Barcelonës, kësaj rradhe nuk do të jetë një përballje direkte për vendin e parë në kampionat.
Katalanasit kanë kaluar dhe janë ende duke përjetuar një moment të vështirë, që prej largimit të Leo Messit nga ekipi. Situata financiare gjithashtu nuk ka qënë një faktor ndihmues. Trajneri Koeman është ende në krye të skuadrës, dhe arsyeja kryesore mbetet fakti që klubi nuk mund të përballojë dot koston e prishjes së kontratës në mënyrë të njëanshme. Thënë këto, Real Madrid duket më i favorizuar në sfidën direkte, sesa rivalët e tyre të përjetshëm në Spanjë. Por, sa mund të parashikohet rezultati i një El Clasico-je?
Një fitore e mundshme përballë Real, shumë lehtë mund të ndryshojë rrjedhën e sezonit për blaugranat. Kjo do t’i katapultonte ata përpara madrilenëve në renditjen e përgjithshme, dhe sigurisht do të rriste shancet për titull. Për të besuarit e Koeman, lajm pozitiv është rikthimi i Ansu Fatit, pas dëmtimit që e la jashtë fushave për gati 1 vit. Ishte pikërisht talenti i ri që shënoi 1 gol dhe 1 asist, në fitoren me përmbysje të Barcelonës ndaj Valencias.
Por përballë Real, mjaft e rëndësishme është dhe eksperienca. Dhe kjo është mbase pika më e dobët e Barcelonës së këtij sezoni. Talentet e reja nuk kanë një lojtar me eksperiencë të kalibrit të lartë, që të shërbejë si busull orientimi për ta në fushë. Për më shumë, mbështetja e tifozëve duket qartë që nuk është më e njejta, pas largimit të Messi nga klubi. Gjithsesi, Camp Nou mund të prodhojë rezultate nga më të çmendurat në ndeshje si kjo, ashtu siç e ka provuar dhe historia.
